SIBU: Kaunsil Mengeri Besai Sibu (SMC) agi berandau enggau ejensi perintah bekaul sebedau bejalaika Program Servis Komuniti.
Sapit Chairman MPS, Rogayah Jamain madah, enti sema program nya dipejalai dudi hari, pesalah ti muai uras sengapa endur nyangka patut diukum bejalaika servis komuniti.
“Raban kaunsil agi berandau enggau beberapa ejensi baka Opis Jil enggau Kort ba pengawa bejalaika Program Servis Komuniti tu,” ku iya.
Rogayah mansutka jaku nya lebuh ditanya atur pengawa ti tau dipejalai ngagai pesalah ti muai uras sengapa endur, ti enggau mayar kompaun taja udah beberapa kali ditangkan.
Sepanjai taun 2018, sepenyampau 897 notis ba penyalah muai uras sengapa endur udah dikeluar, enggau 33.67 peratus pesalah udah mayar kompaun sida empu.
Nitih ku penerang, penyalah muai papung insap ngerikot penyampau peratus kes pemadu tinggi iya nya 466 kes.
Pia mega ku iya, tebal agi pesalah datai ari pengusung ti datai ngusung mengeri nya.
“Sibu nyadi mengeri besai ba kandang tengah lalu ditapatka mayuh pengusung baka a Kapit, Kanowit, Bintangor enggau Sarikei ti datai nandang.
“Agi tubah pengusung enda sedarka kimpin pemeresi ti dipejalaika kitai,” ku iya.
Berengkah ari 1 Julai, 2017, kompaun ba penyalah muai uras sengapa endur udah ditiki RM500 ari RM50 seebdau tu.