KUCHING: Sarawak bejalaika mayuh inisiatif dikena ngemanahka agi kualiti rampa menua asal di nengeri tu.
Kepala Menteri Datuk Patinggi Abang Johari Tun Openg madah entara inisiatif tu iya nya ngaga pansik dikena mansik semua sukut atur mutarka teda (laluh pemakai) di nengeri.
Iya madah pansik nya mungkur pansik baru sentang polisi-polisi, undang-undang enggau institusi, atur sereta kapasiti ngintu pengawa muai teda enggau ngatur pengawa nganchurka teda ke diguna jam diatu.
“Perintah nengeri udah ngepunka pansik dalam mansik baru polisi-polisi, undang-undang enggau instiutsi, atur sereta kapasiti ngintu muai teda enggau pengawa nganchurka teda ke diguna diatu,”ku iya.
Iya madah munyi nya rambau Pengerami Nyuaka Anugerah Rampa Menua Kepala Menteri Sarawak (CMEA) Ke-8, 2017/2018 di sebuah hotel ditu, malam ensana.
“Sarawak ngelaku enggau mengdaptasi prinsip 3R iya nya ‘Reduce, Reuse enggau Recycle, komponen beguna dalam ngatur ulah pendiau penguna siruka rampa menua.
“Kitai nerenak ulah ngurangka pengawa ngaga teda ba pengidup besehari-sehari,’ ku iya.
Kenu ku Abang Johari, ba menua maju baka Kanada, pengawa ngatur teda dedin jauh ke mua dibanding 3R, iya nya ngurang pengawa muai teda tauka uras.
Ba menua Kanada mega ku iya, nyema bisi perengka dibuai, sida naka ulih nguna iya baru.
“Ba menua nyin, pengawa nguna baru nyadi pilih ke lumur tiga dalam tikas ngatur teda. Taja pengawa nguna baru mantu ngintu rama pengeraja aasal enggau ngurangka teda, tang iya ke beguna amat iya nya bisi kus ekonomi enggau rampa menua bekaul enggau chara ngintu uruash enggau pengawa nguna baru.
Ketegal pekara nya, pengawa nguna baru semina diperunding ungkup teda ke enda ulih dikurang tauka dikena baru,” ku iya.
Berebak enggau nya, Kontroler Rampa Menua, kaunsil Rampa Menua enggau Pengeraja Asal (NREB) maya dirandau pengudah pengerami nya madah pansik benung digaga lalu dipelaba tembu March 2019.
“Pansik tu enti nitih udah tembu, tang kaban komiti teknikal madah mayuh pekara patut diperati enggau diuji, nyadi konsultan ke dipadu minta awak endur nembuka pengawa nya.
“Kitai ngarap asil pansik tu ila, deka bisi langgur penemu ungkup polisi-polisi, atur sereta pelin pengawa baru ke jauh lebih manah awakka sistem ke menyana ulih diguna,” ku iya.
Iya madah pansik nya udah berengkah ba bulan Disember 2017 mungkur semua nengeri enggau 26 piak kaunsil kandang menua.
Tambah mega, asil pansik nya ila deka ngujungka pengawa ngintu teda kering lebih ari ari sektor pengawa berumah ba Sarawak dipejalai enggau manah lebih agi nadai ngeruga rama menua.
Iya madah sekeda konsultan udah dichiri nyengkaum ari konsultan dalam menua enggau menua luar ari Denmark, United Kingdom enggau Itali nyengkaum Semenanjung Malaysia.
“Kitai nguna peneleba ba menua maju di Sarawak dikena ngiring kitai ngintu teda enggau kitai berati enggau manah ni bagi ke pemadu manah sereta engkeman dipejalai ba nengeri tu,” ku iya.
Sawal ke mega chairman komiti teknikal nya madah pengudah nerima ripot ke tembu, randau khas raban deka digaga endur beratika buah penemu asil ari pansik.
Bela bisi kaul ba pansik tu iya nya Opis Menteri Pemansang mengeri enggau Rampa Menua, Opis Menteri Kaunsil Kandang Menua enggau Pengawa Berumah sereta opis-opis perintah nengeri ke bekaul.
CMEA berengka dikelala kena 2001 diatur NREB begulai enggau perintah nengeri lalud iatur dua taun sekali dikena meri basa ngagai bantu sereta sukung ari piak industri enggau mega ngagai orang ke nyaup ngintu enggau nyaga rampa menua ba nengeri tu.
CMEA Ke-8 berambaika jaku “Memupuk Penjagaan Alam Sekitar’ ngemataka sekeda kategori dipekitka iya nya Industri besai (pengeluar), Industri jelan pemesai, industri mit, orang kediri & pemberita, kedai makai, servis -logistik, servis, ejensi perintah : piak kaunsil kandang menua, betanam betupi enggau opis kampung, pengawa berumah enggau ngali sereta ngintu pengeraja.
Serak tu 11 champion ke udah dipadu iya nya Shin Yang Trading Sdn Bhd, Press Metal Bintulu Sdn Bhd, Malaysia LNG Sdn Bhd, Sime Darby Austral Sdn Bhd, Wargana Consortium Sdn Bhd, Fly Technology Agriculture Sdn Bhd, Dewan Bandaraya Kuching Utara, Cecelia Sman (The Borneo Post), Jinhold Restaurant, Payung Cafe enggau Min’s Cafe.
Sama bisi datai bini Kepala Menteri, Datin Patinggi Dato Juma’ani Tuanku Bujang,Menteri Kaunsil Kandang Menua enggau Pengawa Berumah,Datuk Dr Sim Kui Hian, Menteri Pelajar, Sains enggau Pansik Teknologi Dato Sri Michael Manyin Jawong, Menteri Muda Pengatur Mengeri, Ngintu Tanah enggau Rampa Menua, Datu Len Talif Salleh, Menteri Muda Kaunsil Kandang Menua Datu Dr Penguang Manggil, Menteri Muda Dagang Temuai,Seni enggau Main Asal Datuk Lee Kim Shin sereta Presiden Gerempung Besai Pedagang Sarawak (SBF) Datuk Abang Abdul Karim Tun Openg.