SIBU: Parti Keadilan Rakyat (PKR) Kanowit ngelalau bala tuai rumah (TR) ba pelilih nya ngaga ripot polis nyema sida empai nerima elawin nyadi tuai rumah.
Chairman PKR Kanowit George Chen madah, pekara tu mayuh ditapi bala tuai rumah maya hari tu ukai semina di Kanowit tang mega di menua bukai.
“Sida ukai semina lalu empai nerima elawin tang mega bisi nya diemba tauka ditagang ngulu program ke diatur Pakatan Harapan (PH).
“Bisi mega enda dikemendarka nyadi tuai rumah agi ketegal ti nyukung PH suba.
“Sentang elawin kitai minta bala tuai rumah datai ngaga ripot polis,” pia ku iya maya aum media ditu, kemari.
Maya aum media tu, empat iku tuai rumah ari Ngemah mantaika sebana sida ngagai iya.
Sida tu iya nya TR Uding Bungai, TR Martin Busu, TR Ngiau Nyelipan enggau TR Ludan Nyuak.
Pemadu lama enda nerima elawin iya nya TR Martin. Iya enda nerima elawin nya ba pengelama 23 taun ditangkan TR Ngiau (22 taun), TR Uding (10 taun) enggau TR Ludan (empat taun).
Nyukung penemu George, Mandal Chairman Parti Tindakan Demokratik (DAP) Sarawak David Wong ti bela datai maya tu madahka pekara nya siti isu ke besai.
“Elawin tuai rumah tu bisi ba Community Chiefs And Headmen Ordinance 2004 ba baruh Seksyen 7 dalam undang-undang nengeri Sarawak.
“Nya alai, sapa-sapa enda ulih ningkah atur tu laban atur tu udah disetujuka kabinet nengeri Sarawak,” ku iya nerang.
Berindik ari nya, David minta perintah nengeri ulih mantai kebuah nama isu tu tau nyadi diatu.
“Nyema nadai pengawa deka mutarka isu tu kitai deka mai ngagai Aum Kunsil Nengeri,” pia ku iya.
Kelimpah ari nya, iya madahka pengawa milih nyadi tuai rumah endang hak peranak rumah panjai empu ti udah nyadi adat kenyau ari kelia.
“Enda ngira sapa, adat rumah panjai milih tuai rumah enda ulih diubah.
“Ngarapka isu tu diputar enggau lengkas laban sida ke nadai elawin tu agi meras bejalaika tanggungpengawa sida nyadi tuai rumah,” ku iya madah.
Sama bela datai maya tu iya nya Sapit Chairman PKR Kanowit Thomas Laja.