Dikarang Rengenyan Labang
KUCHING: Sarawak bejadika bas elektrik keterubah ti mega nyadi projek pemungkal ke diberi nama 'CRRC Electric City Bus', sehari tu.
Kepala Menteri Datuk Patinggi Abang Johari Tun Openg madahka, projek pemungkal bas elektrik nya deka berengkah dikena ba pun taun baru.
Prototaip bas nya produk projek pemungkal kerejasama entara kompeni menua tu HENZ Pacific Sdn Bhd enggau kompeni ari menua China, Zhejiang CRRC Electric Vehicle Co.Ltd.
"Baka ke dipadahka ngagai aku, projek pemungkal bas nya ti berengkah pun taun baru deka nyendiaka servis nadai bebayar ngagai semua peranak menua tu enggau temuai dalam timpuh tiga bulan tang dipelanja ulih piak peribit.
"Bas elektrik tu disikap ngena 5 CCTV, accessible wheelchair, WiFi nadai bebayar, video passenger counter, broadcasting content control system, enggau GPS Bus Tracking System App," ku iya.
Abang Johari mansutka pekara nya dalam teks jaku iya ti dibacha Sapit Kepala Menteri ti mega Menteri Pemansang Infrastruktur enggau Perengka Pengangkut, Tan Sri Datuk Amar James Jemut Masing lebuh bejadika produk ‘Sarawak 1st CRRC Electric City Bus’ ti diatur ba BCCK ditu.
Bas elektrik nya deka bejalai 12 kali sehari ari pukul 7 pagi ngagai 6 lemai, ti berengkah ari Satok mansa jalai Jejak Warisan lalu nuju ngagai iCom Square. Penyauh penjalai bas nya urung 14 kilometer.
Bas nya ulih ngundan urung 53 iku orang tambang, lalu dikena mungkal deka beoperasi di mengeri Kuching dulu sebedau dikerembai ngagai endur bukai.
Abang Johari bejaku baru madahka senipak enggau Taun Nemuai Sarawak 2019 iya meri penemu ngagai Opis Menteri Dagang Temuai, Seni, Main Asal, Nembiak enggau Lumba enggau Main ngambika berunding sereta nempa kerejasama enggau CCRC Electric Vehicle Co. LTD bekaul enggau pengawa ngerembaika servis nadai bebayar.
"Tu peluang ti manah ngagai Sarawak sereta industri ngelakuka nengeri tu nyadi palan eko-dagang temuai ti tegap," ku iya.
Sama bisi datai ngagai pengerami nya sehari tu, Menteri Muda Nembiak enggau Lumba enggau Main Datuk Snowdan Lawan, Party Secretary Zhejiang CRRC Electric Vehicle Co.Ltd Zheng Wei enggau Managing Director Henz Pacific Sdn Bhd Henry Lai sereta ke bukai.