Anda di sini

Bisi 3,377 peminta peranak nengeri tu benung diproses KDN

ALAN LING
ALAN LING

MIRI: Sepenyampau 3,377 peminta ari Sarawak diatu benung dalam proses ba Opis Menteri Dalam Menua (KDN) ti deka dipejalaika enggau jampat ngagai semua peminta peranak menua nengah chara berenggat sereta setipak enggau agih undang-undang ari baruh Konstitusyen Perintah Besai.

KDN nimbal tanya ari Senator Alan Ling ke mega madahka penyampau tubuh peminta peranak menua diterima ari taun 2013 nyentuk 15 November 2018, ari serata menua manggai 75,653 peminta ari baruh Artikel 15 (2), Artikel 15 (A) enggau Artikel 19 Konstitusyen Perintah Besai.

Ba pekara tu, Alan ti mega Sekretari Pakatan Harapan (PH) Nengeri, deka ke perintah baru diatu mutarka isu bekaul enggau peminta undang-undang, ti ngasi sereta nyata agi enggau ti nadai kelikuh birokrasi.

Iya nanya pasal pekara nya dikena nentuka pekara ti semak enggau ati iya, diputarka perintah baru PH.

“Pengudah 9 Mei 2018, mayuh bala datai betemu enggau aku sereta bala bakih aku laban kami udah megai Perintah Besai, ari nya, pengingin aku deka minta perati sereta mutar timpuh lima taun kami megai perintah,” ku iya lebuh mantaika isu nya kemari.

“Iya mega bisi mantaika isu tu lebuh ke ngulu randau bejuraika suku penggal Atur Pemansang Malaysia Lumpar Ke-11 (RMK11) kemari sereta minta KDN siru agi ba pasal peminta ti digaga laban timpuh ngatur pengawa suah agi lama amat nyentuk ke betaun pengelama sereta nadai pemutus,” ku iya.

Alan dalam jurai iya ba Dewan Negara, madahka tagit perintah enda patut lalu reti ba sida nadai ngembuan status peranak menua lalu nganti saut peminta chukup ‘ngeruga runding sereta ngasuh sida ti nadai dokumen sah kusut runding laban enda ulih mindah sepeneka ati ba menua diri empu lalu mar ngiga kereja.

Iya bechuntoka penusah ti nyadi ke alai siku peminta dipinta nganjung peminta baru pengudah dua taun nganti enggau nadai kebuah, nama kebuah peminta iya ditulak.

“Leman birokrasi ti ngenusah orang ti minta enggau sida sebilik laban sebarang dokumen nyukung enggau chuan penerang ti dipinta udah diserah ngagai peminta keterubah lalu semua udah bisi dalam sistem penerang KDN.

“Ulah bala staf opis ti minta orang nganjung baru peminta enggau semua dokumen (sebedau tu udah diberi) pengawa ti betandu sereta masau jam enggau belanja, kelebih agi enti sida datai ari kandang menua pesisir,” ku iya nambah.

Alan ti mega Sekretari DAP Nengeri udah ngelalau perintah baru anang nandu ulah baka enda ibuh enggau ‘pansa lalu’ aja peminta baka ti digaga perintah ke sebedau tu.

Kebuah pia, laban mayuh peminta udah nganti lama ari sida mit nyentuk ke besai tuai, ari umur biak nyau manggai umur tuai lalu bisi sekeda sida tu putus pengarap.

Bepelasarka pekara tu, Alan meda deka berundingka atur pengawa nyadi lurus agi lalu kreteria nya dibantai ngambika ditemu bala peminta lalu pemesai KDN bejalaika inisiatif madahka peminta ditulak enggau chara lurus disempulang kebuah ti patut.

“Nya alai aku ngemaruhka diri deka meri langgur penemu ngagai KDN ngambika meri kuasa ngagai bala pemesai ngumpul baru peminta ari Sabah enggau Sarawak dalam proses ‘diperunding’ ngambika sida nemu pekara ti nyadi ba menua nya (Sabah enggau Sarawak) ulih meri perambu enggau buah penemu nentuka peminta nya dikemendar,” ku iya nambah.