SIBU: Penyampau eksport produk ari nengeri Sarawak manggai RM69.58 bilion naka bulan September 2018 tu.
Menteri Muda E-Dagang Datuk Mohd Naroden Majais madah, ari penyampau nya, penyampau import ke diatu iya nya RM33.03 billion.
“Ba taun 2017, eksport nengeri Sarawak niki 28.2 peratus iya nya RM81.93 bilion enti dibida RM63.9 bilion ba taun 2016,” pia ku iya madah maya Program Sarawak Export Day 2018 ba Kingwood Hotel ditu, kemari.
Iya maya tu ngarika Menteri Dagang Antarabansa enggau E-Dagang ti mega Menteri Wang II Dato Sri Wong Soon Koh.
Sama bela datai maya tu iya nya Sekretari Mendam MITeC Kameri Affandi enggau Direkter Transformasi enggau Dagang Digital, Opis Pemansang Dagang Luar Malaysia (MATRADE) Amran Yem sereta Residen Sibu Charles Siaw.
Naroden ti mega Menteri Muda Pemansang Pengawa Dagang Mit enggau Jelan Pemesai madah, pemujur tu bepun ari pengeransing ngelakuka barang eksport nengeri tu taja pejalai ekonomi menua bisi lubah.
“Menua ke suah agi alai eksport produk nengeri Sarawak iya nya Jipun kelimpah Semenanjung Malaysia , Taiwan sereta India enggau penyampau lebih 70 peratus eksport ngelama tu,” ku iya madah baru.
Kelimpah ari nya, Naroden maya aum media madahka bisi kes nyadi alai produk orang dagang nengeri tu ti dieksport ngagai menua bukai dipulaika baru ketegal enda nitihka prosedur tauka atur menua alai eksport nya.
“Tu deka mai pengerugi ke besai lebih agi enti barang nya barang pemakai ti enda tan lama baka ke nuntung siku orang dagang di Kuching empai lama.
“Pekara tu nyadi laban produk ke dieksport sida enda nitihka prosedur enggau atur,” pia ku iya.
Iya madah, menua ti terit bejalaika prosedur alai eksport barang baka Jipun, Eropah enggau Australia.
Ketegal nya iya minta orang dagang anang sanggu betanya ngagai MATRADE bekaul enggau prosedur ke betul sebedau eksport barang ngagai menua bukai.
“Kelimpah ari nya, kitai mega ngelalau orang dagang nengah internet meseti nemu prosedur ti betul lalu tau betanya ngagai MATRADE,” ku iya madah.
Amran maya tu mega madahka enda semua menua bekenaka prosedur ke sama maya nerima barang ke dieskport.
“Tiap iti menua bisi prosedur ke enda sama.
“Nya alai, kitai ngarapka orang dagang menua tu betanya ngagai kami penerang ke betul.
“Kami nyendiaka servis enda bebayar kelimpah orang dagang ke deka nyadi raban mega nadai bebayar,” pia ku iya.