SIBU: Presiden Parti Rakyat Sarawak (PRS) Tan Sri Datuk Amar Dr James Jemut Masing ngumbai ‘orang Malaya’ (perintah Pakatan Harapan) enda ulih dikearap.
Ambika chunto ku iya, pengawa numbuhka komposisi Komiti Pemesai Sempekat Malaysia 1963 (MA63) kena 10 Oktober tu tadi semina ngengkahka bela dua pengari ari Sarawak enggau Sbah nyadi kaban komiti seraya ke bukai iya nya 12 iku agi kaban ari ‘Malaya’ ti diketuaika empu Menteri Besai Tun Dr Mahatdir Mohamad.
“Tu enda adil sereta bechiping. PRS enda setujuka komiti ti ditumbuhka tu.
“Manah agi enti penyampau tubuh nyadi kaban iya nya sama ngaul Sabah, Sarawak enggau Semenanjung Malaysia.
“Nya kebuah aku ngumbai sida tu (orang Malaya) enda ulih dipechaya lalu pengawa kitai nagih hak ba MA63 chukup pedis,” ku iya lebuh bejadika Aum Besai Deligit Khas (EDC) PRS ba Sebuah Hotel tebilang ditu, lemai ensana.
Sama bisi datai Sekretari Besai PRS Datuk Joseph Salang Gandum, Ketuai Nembiak PRS Datuk Snowdan Lawan, Ketuai Indu PRS Datuk Seri Doris Sophia Brodie sereta bala kaban komiti parti bukai.
Ngelansa sentang industri minyak enggau gis ba nengeri tu, Masing ti mega Sapit Kepala Menteri madahka konstituasyen nengeri terang madahka semua minyak enggau gis ba Wilayah Sarawak diempu Sarawak.
Serikat minyak bukai nyengkaum Petronas, ku iya, ti deka nyerungkai enggai ngali minyak enggau gis ba Wilayah Sarawak patut ngulihka lisin ari Sarawak.
“Petronas mesti ngulihka pemendar ari kitai enda sema deka bejalaika aktiviti minyak enggau gis ba nengeri tu. Pengelama 40 taun ke udah, Petronas/Malaya udah ngambi pemansut kami lalu ninggalka mimit asil nya ungkup kami ngemansangka Sarawak,” ku iya madah nyetemak.
Nitih ku Masing ti mega Menteri Pemansang Infrastruktur enggau Perengka Pengangkut, sehari Petronas udah ngambi urung 300,000 nyentuk 800,000 setong dram minyak ari Sarawak.
“Tu baka ti dibacha aku ba sebuah berita nasional nengah ripot Bernama ti ditibak nengah penerang Ketuai Pemesai Eksekutif Petronas Tan Sri Wan Zulkiflee Wan Arrifin ti nerangka penyampau ke amat minyak ti diambi timpuh sehari aja.
“Taun nyin aja, Petronas udah ngambi urung 850,000 setong dram sehari ti ngaul asil sepenyampau RM224 juta sehari. Enti sebulan, setaun, tentu mega asil iya mayuh amat. Tang kitai ti ngempu pemansut semina nerima lima peratus aja royalti, adil tauka enda?” ku iya nandu.
Ngelansa pasal Gabungan Parti Rakyat Sarawak (GPS), ku iya, gempung nya deka seruran gawa negika hak rayat nengeri tu.
“Kami enda nyemilik Pakatan Harapan (PH) ti diketuaika Tun Mahathir. Kami berunding GPS deka nyukung politi PH enti iya ngemai pemaik ngagai Sarawak lalu kami deka mantah sida enti tuju pengawa ngerusak tauka besibil enggau pemerat Sarawak,” ku iya madah nyemetak.
Ku iya, GPS deka nyadi penyakal ti bisi tanggungpengawa ba Putrajaya.
Ba lansa bukai, ku Masing, dikena nyendiaka diri napi Pengawa Bepilih Nengeri 2021 ila, GPS patut bejalaika pengawa sida nyaga hak nengeri enggau rayat Sarawak sererta nempa pengawa bekunsika kuasa ti besai reti.
“Input enggau penemu dipansutka kami dikena nambahka pemanah GPS sereta dibantai ngena pengelurus pulaika pemaik ngagai gempung kami,” ku Kaban Kunsil Nengeri (ADUN) Baleh nya.
Nya kebuah ku iya, GPS enggau bala ketuai mesti mending memanah sereta nyadi gempung parti belalauka parti asal ari Sarawak.
“Tu penegap kitai dibida enggau parti ti penatai asal ari Semenanjung Malaysia. Semua tu belalauka Semenanjung Malaysia,” tandu iya.
Masing ngingatka GPS iya nya parti ti ngemeratka Sarawak lalu iya relevan nyadi parti menua tu ti diketuaika peranak Sarawak empu.
Berebak enggau nya ku Masing, EDC sekali tu berandauka pangku pengawa Sapit Presiden PRS ti ditinggal puang Datuk Joseph Entulu Belaun ti ditingkil ari parti dalam bulan April tu tadi.
“Tu siti ari agenda ti deka dipejuraika kitai nengah EDC sekali tu sereta beberapa pekara bukai ti bekaul,” ku iya nambah.