KAPIT: MP Kapit, Datuk Alexander Nanta Linggi enggau Kaban Kunsil Nengeri Bukit Goram Jefferson Jamit Unyat apin lama udah ngelancharka ‘Fun Run’ Kapit.
‘Fun Run’ nya diatur b eserimbai enggau pengerami ngintu penumbuh Ke-25 Kaunsil Sungai–Sungai Sarawak. Kapit siti ari palan ke dipilih endur ngintu pengerami nya.
Pengawa belanda sepenyauh 4 kilometer nya udah matak 396 pesereta ari semua serak nyengkau, bala pengajar, nembiak, pengereja opis pengerai, orang dagang lalu enda tinggal mega orang ti ngangkut barang ba teminal penyangkai.
Nanta lebuh ke bejaku, meri terima kasih ngagai SRB laban udah milih Kapit nyadi siti ari palan endur ngintu pengerami nya.
Iya mega muji sambut ke manah ari mensia mayuh, laban komiti pengatur semina nagit 250 iku pesereta aja tang ke ngambi bagi bisi 396 iku.
Berebak enggau nya, champion ba kategori Lelaki Tebuka iya nya Yong Zin Fei, Loh Leong Hua ba lumur dua lalu Tony Limbi ba lumur tiga. Penerima perais sagu ati ari lumur empat ngagai sepuluh iya nya Hillary Kadar, Albert Tony, teo Hao Hun, Nuwin Liun, Victor Mean, Anthony Aeron enggau Beskham Arun.
Ungkup kategori Indu Tebuka; Jselina Jelaini udah nyadi champion, Nia Kanisius ba lumur dua lalu Ling Sei Hiong ba lumur tiga. Penerima perais sagu ati ari lumur empat ngagai sepuluh iya nya Anye Li, Yong Yea Ling, Nyuulang Soon, Hnu Miu Ming, Bung Nur, ting Ai Nai enggau Andissa Ngerang.
Sama bisi datai Kontroller SRB Richard Tajan, Sapit Kontroller Abang Mohammad Abang Naili, Pemantu Kontroller Bagi Kandang Tengah Menua Haji Hatta Morshidi, Ketuai SRB Kapit Jerry Lenggir, pemesai pengatur pengawa Opis Pelilih Kapit Bidah Lujah, OCPD Kapit DSP Freddy Bian enggau bala bukai.