Anda di sini

DAM deka ngatur Pekit Ngajat, Betaboh kena 20 Okt tu

 Mensia mayuh ti ngembuan pengelandik ngajat enggau betaboh ditesau bela ngulu pekit tu.
NGETANKA MAIN ASAL: Mensia mayuh ti ngembuan pengelandik ngajat enggau betaboh ditesau bela ngulu pekit tu.

MIRI: Ungkup sida ke lelaki enggau orang indu nyengkaum nembiak ti ngembuan pengelandik ngajat diperansang ngambi bagi ba pekit ngajat ti digaga kena 20 Oktober tu.

Kelimpah ari nya, tim betaboh mega sama ditesau ngambi bagi maya pekit nya ila.

Gerempung Dayak Miri (DAM) deka ngatur Pekit Ngajat enggau Betaboh ti bepalan di Imperial Mall ditu, berengkah ari pukul 10 pagi.

Nitih ku Chairman Pengatur Jacqueline Selaka Mawar, ba pekit ngajat bisi lima kategori ti disedia iya nya Ngajat Dalam Tim, Ngajat Individu Lelaki, Ngajat Individu Indu, Ngajat Individu Nembiak Lelaki sereta Ngajat Individu Nembiak Indu.

Ungkup kategori Ngajat Dalam Tim, champion deka mai pulai perais mata duit RM2,000 trofi enggau setipikit, lalu ba penuduk lumur dua nerima RM1,500 sereta lumur tiga nerima RM1,000. Kededua bela nerima trofi sereta setipikit.

Ungkup kategori Ngajat Individu Lelaki enggau Indu, champion deka mai pulai RM700, penuduk lumur dua nerima RM500 lalu penuduk lumur tiga nerima RM300 semua nya bela deka nerima trofi enggau setipikit.

Ba kategori Ngajat Individu Nembiak Lelaki enggau Indu, kededua champion deka mai pulai mata duit RM500, penuduk lumur dua RM300 lalu penuduk lumur tiga RM200. Semua pemenang deka diberi trofi enggau setipikit.

Ba pekit betaboh, tim ti nyadi champion deka nerima perais mata duit Rm2,000, ditangkan ke pnuduk lumur dua RM1,500 lalu penuduk lumur tiga mai pulai RM1,000. Pia mega semua sida ke menang deka diberi setipikit enggau trofi.

Beserimbai enggau nya, ungkup tim ti bisi ngambi bagi tang ba penuduk saguhati deka nerima RM100, hamper enggau setipikit.

“Hari bulan kepenudi nganjung peminta iya nya 12 Oktober ti deka datai, lalu pom nya meseti datai ba opis DAM kena tauka sebedau hari bulan nya, ba jam orang gawa,” ku Jacqueline nyemetak.

Nyema bisi tanya enggau silik bekaul pekit tu ulih betelefon terus enggau Jacqueline Selaka ba lumur 016-8786205, Rabi Impen (010-4093913) tauka Kitty Janggot di lumur 085-435467 maya jam orang gawa aja.