Anda di sini

Anang ngena ejen ngaduka dokumen pengelala di JPN

MIRI: Mayuh ti napi penusah bekaul status peranak menua enggau dokumen pengelala iya nya ari sida ti ngadu pengawa nya nengah ejen laban takut ngaga peminta ngagai Opis Pengerejister Bansa (JPN) kediri.

Kaban Kunsil Nengeri (ADUN) Pujut Dr Ting Tiong Choon madah, sida patut datai kediri empu betemu enggau staf JPN ke mega deka mantu sida bakani chara ngulihka dokumen pengelala ti sah ari perintah.

“Sebedau tu mayuh sida enggai datai ke JPN, udah nya ngena ejen ngerejister ke sida lalu tu ti ngenataika penanggul.

“Lalau ku ngagai semua apai indai enggau komuniti semua, nyema bisi pekar ti deka ditanya, datai terus ngagai JPN. Staf dtu deka mantu lalu mutarka penanggul kita. Anang ngena ejen,” ku iya nyemetak.

Ting madahka pekara tu ngagai pengarang berita lebuh ti nguluka lebih 30 iku sida ti nganjung peminta ari Miri, Marudi enggau Limbang di JPN Palan Transformasyen Mengeri (UTC) kemari.

Ting madah, dalam timpuh 30 taun, mayuh peminta status peranak menua enda diterima tang enda meri ketegal ti kuat ngagai sida ti nganjung peminta.

Iya ngarapka, ari baruh perintah baru Pakatan Harapan (PH) proses ti lawit ke ngasuh peminta pedis ulih dipuntang nengah kaul ti rat entara ejensi perintah enggau rayat.

“Entara tuju bukai penemuai kitai ke JPN iya nya ngerapitka kaul JPN enggau rayat. Ngarapka chara tu nyadi pun kaul ti manah dalam perintah baru. Kitai deka nguji semua pengawa ti patut dikena ngemuntangka pekara tu,” ku iya nambah.

Kena 31 Ogos tu tadi, opis Parti Tindakan Demokratik (DAP) Miri udah ngatur Forum Peranak Menua ti udah diatur ADUN Bukit Assek Irene Chang dikena nerangka prosedur sereta pekara ti dipinta lebuh nganjung peminta.

Penemuai kemari iya nya sambung ari forum nya dikena ngempung sereta nguluka sida ti ngaga peminta betemu enggau JPN.

“Kitai meri besai terima kasih ngagai piak JPN laban udah mantu kitai. Kitai mega ngarapka nengah chara tu (meri penerang) deka meransang mayuh agi orang datai kediri empu ke JPN lalu ngaga peminta. Sida mega ulih betemu enggau kami (DAP) nyema bisi begunaka bantu,” ku iya nyemetak.