BETONG: Lebih 700 kutak ai irup bisi diagih kelab Permotoran MPV Proton Exora, Sarawak Exorian Crew (SEC) enggau Kelab Melayu Sarawak (KMS) ngagai peranak di empat genturung pendiau di Betong bedau lama tu tadi.
Konvoi Kembara Amal nya ngejang ari Kuching disereta lima buah entuka mpv enggau sebuah lori ke ngundan 700 kutak ai irup.
Ai irup nya diagih ngagai Kampung Supa, Kampung Tuie, Kampung Serabang enggau Kampung Medang.
Presiden SEC, Afiq Azwandy Nalasion Abdullah madah program diatur enggau tuju mantu rayat ba sekeda genturung pendiau ti bisi napi penusah suntuk ai, kelebih agi irup.
“Pemeri tu dikearap ulih mantu sida ba musim kemarau kelebih agi ba pengerami hari raya Aidil Adha ti deka datai,’ku Afiq ba pengawa ke diatur di pasar malam Betong.
Iya netapka bantu enda ulih diberi ngagai semua genturung pendiau ketegal pemar ba pekara logistik enggau pengurang ba pekara belanja.
Tajapia ku Afiq nambah, bantu pengasih tu deka digaga baru jemah ila.
Ketuai Kampung Tuie, Mostapha Berahim, 53, madah berasai gaga enggau bantu ke diberi lalu ngarap bisi agi raban bukai neladan pengawa ke udah digaga SEC enggau KMS.
Bela datai nerima bantu iya nya Ketuai Kampung Supa, Medang dan Serabang.
Pengawa nerima bantu ari Ketuai Zon SEC Kuching, Zulkiflee Sebli, Ketuai Zon SEC Sibu, Husaine Zaini sereta pengari ari opis Residen Betong enggau polis Betong.