KUCHING: Perintah Besai patut mendingka peminta nengeri sereta mayar 20 peratus royalti minyak bepelasarka pemansut tauka asil tang ukai nitihka gaya penguntung.
Menteri Dagang Temuai, Seni, Main Asal, Nembiak enggau Lumba enggau Main, Datuk Abdul Karim Rahman Hamzah madah, laban entara pemansut tauka asil enggau penguntung bisi bida.
Iya ngarapka Perintah Besai Pakatan Harapan (PH) ti diiring Menteri Besai Tun Dr Mahathir Mohamad ulih nerangka pekara nya enggau silik sereta betul.
“Aku ngasaika manah Tun M ngenang pasal pekara tu, mandangka iya mendingka peminta nengeri ti ngemansutka minyak.
“Udah tentu kitai Sarawak minta 20 peratus nya bepelasarka pemansut tauka asil lalu ukai 20 peratus ari asil penguntung.
“Laban enti 20 peratus ari penguntung, nyema rega minyak dunya baruh lalu udah tentu pemansut tinggi, 20 peratus nya ulih kurang ari 5 peratus ari ke diulih kitai diatu,” ku iya.
Abdul Karim mansutka pekara nya lebuh dikerandau raban pengarang berita pengudah tembu aum pengarang berita Pekit Tanda enggau Pekit Lagu Melayu Asli ke diatur ba Rumah Sarawak ditu, kemari.
“Tang utai ke dipadahka iya (Tun M) enda nyemetak, bisi maya iya nyebut 20 peratus royalti, maya bukai iya (Tun M) madah 20 peratus penguntung, mayuh amat bida entara 20 peratus royalti tauka pemansut tauka asil enggau 20 peratus penguntung,” ku iya.
Tun Mahathir (Tun M) maya baum ba Dewan Rakyat ensanus madahka perintah deka ngamatka semaya meri royalti 20 peratus ngagai nengeri ti ngemansutka minyak.
PH dalam manifesto Pengawa Bepilih Besai Ke-14 besemaya nambahka royalti ngagai semua nengeri ti ngeluarka petroleum ngagai 20 peratus iya nya Sarawak, Sabah, Kelantan enggau Terengganu.
Lebuh ditanya kelimpah ari ngarapka royalti minyak nya, nama pemansut bukai dikena ngemansangka menua tu, Abdul Karim madahka perintah nengeri deka ngena enda ngira pemeri, ungkup, royalti, dividen ari pemeranak puku, bajet diberi perintah besai ari chukai jual enggau ke bukai dikena ngemanahka infrastruktur sereta nguntungka rayat.
Ku iya, diatu kitai meda Datuk Patinggi Abang Johari Tun Openg ke nyadi Kepala Menteri mekuh ngagai pemansang infrastruktur enggau perengkaguna mensia mayuh ungkup peranak menua pesisir.
Perintah nengeri chakah mekuh deka nyambungka menua pesisir ngena jalai alun, arus internet, bekal ai beresi sereta ke bukai laban kitai enda tau tinggal dibelakang nengeri bukai, ku Abdul Karim.
“Kitai ngarapka perintah besai ulih berundingka kitai, Sarawak nengeri ke pemadu besai di Malaysia lalu enda patut diberi mimit dibandingka enggau nengeri bukai baka Kedah enggau Perlis ti mit menua.
“Tambah mega (asil) ke diberi ngagai nengeri bukai nya pan asil ari pengeraja asal kitai. Nya alai kitai enda patut disiping,” ku iya.