MARUDI: Menteri Muda Kaunsil Kandang Menua, Datu Dr.Penguang Manggil ngingatka nama kebuah Perintah Nengeri numbuhka Gabungan Parti Sarawak (GPS) datai ari Parti Pesaka Bumiputera Bersatu (PBB), Parti Sa’ati Rayat Sarawak (SUPP), Parti Rakyat Sarawak (PRS) enggau Parti Demokratik Progresif (PDP) lalu ba renggat Perintah Besai kitai nyadi penyakal tang kitai megai perintah di Sarawak.
Iya nerangka pekara ti nyadi di renggat nengeri ba mua mayuh rambau atur Gawai Ngiling Tikai ti diatur di Rumah Sayun Galan, Sg Arang, Ili Bakong apin lama ke udah.
Datu Dr Penguang mega minta enggau meransang mensia mayuh nyukung GPS di baruh pegai tulen peranak Sarawak laban gempung nya endang 100 peratus gawaka peminta enggau juluk peranak Sarawak.
Kelimpah nya, Penguang ngenggaika penemu ari sekeda ti madahka GPS tu sebaka enggau Barisan Nasional (BN) lalu semina betukar kulit aja, baka tuak lama dalam butul baru, ku iya seraya nyamin GPS tu mayuh bida.
“GPS endang dipegai tulen peranak Sarawak lalu ulih lantang bejakuka peminta peranak Sarawak,” ku iya.
Dr Penguang mega nangkan rayat anang mendingka berita bula ti ditabur di rumah panjai laban sida meruan baka selama lalu enda lama agi, iya deka ngemai bala kaban PDP di N76 baum, nerang sereta madah nama pekara ti nyadi ngagai parti PDP sida.
Nangkan nya ku iya, lebuh pengawa ngintu Hari Apai, dikena ngerapitka kaul peranak ari kandang menua Marudi sereta menua besemak, ke alai penyerakup pekara pemadu manah antara sida.
Berebak enggau nya, Datu Dr.Penguang ke lalu nyadi Kaban Kunsil Nengeri (ADUN) Marudi bisi nyuaka geran Projek Mit Pemansang Menua Pesisir (MRP) ngagai tiga gempung Komiti Pemansang enggau Pengelikun Genturung Pendiau (JKKK) Rumah Sayun Galan penyampau RM25,000, Biro Indu Rumah Sayun nerima RM5,000 enggau Serakup Indu Rumah Pong nerima RM10,000.
Antara sida bisi datai nyempulang Penguang, Sekretari Politik Kepala Menteri Alexander Asing Sadai, Chairman Kaunsil Pelilih Marudi (MDC), Edward Mendai, Datin Monica Ukong, Penghulu Nyadang Rengkang, Pemancha Engah Nuga enggau Penghulu Benang Pilang.