Anda di sini

BBS Sibu, stesyen Minyak Shell Emparia ngatur program latih napi penusah angus

 Opis Bomba Sentral Sibu begambar begulai enggau staf stesyen Minyak Shell Emparia Sdn Bhd.
NAMBAH PENEMU: Opis Bomba Sentral Sibu begambar begulai enggau staf stesyen Minyak Shell Emparia Sdn Bhd.

SIBU: Balai Bomba Sentral (BBS) Sibu nyaup meri latih napi penusah angus begulai enggau stesyen Minyak Shell Emparia Sdn Bhd ditu, ensanus.

Pemesai Bomba Kanan II Jankey Jikat madahka latih nya beguna bendar dikena meri penemu ke engkeman ti patut dikembuan nyema bisi nyadi penusah angus.

“Latih tu ukai digaga kitai sepeneka ati aja tang tu nyadika chara kitai mantai ngagai mensia mayuh nama ke patut digaga nyema bisi nyadi penusah angus.

“Nya alai, sida ke gawa ba stesyen minyak baka tu patut bisi penemu ke engkeman kelimpah lengkas madah ngagai bomba nyema bisi penusah nyadi,” pia ku iya madah ngagai pengarang berita sepengudah nyadi ketuai latih nya.

Bela ngulu latih tu iya nya menijar stesyen Minyak Shell Emparia Sdn Bhd Angelina Ting Poh Chuo.

Maya latih nya, sebuah kerita ti benung ngepam minyak ngenyit meletup lalu angus.

Penusah nya nyadi urung 10.04 pagi nejuka sida ti gawa dia berasai tekenyit sereta beguai ngerarika diri ngagai endur ti likun.

Bisi mega sekeda ari sida nguji ngerara api kelimpah siku agi bebendar nyelamatka orang ke ngempu kerita ti agi tepekul dalam nya.