SIBU: Penyampau kes ke bisi datai minta bantu bekaul status peranak menua bisi nambah dua kali lipat dalam timpuh dua minggu pengudah Pakatan Harapan (PH) mujur megai perintah besai.
Kaban Kunsil Nengeri (ADUN) Bukit Assek Irene Chang madah pekara tu beduduk ari rayat ti ngandalka perintah PH ulih mutarka penanggul sida ti puntan diputar perintah Barisan Nasional (BN) suba.
“Parti Tindakan Demokratik (DAP) Sibu deka bebendar mutarka kes tu enggau lengkas dikena nentuka mayuh sida ke mayuh minta bulih status peranak menua.
“Taja pia, kitai ngarapka rayat meri peluang ngagai perintah PH ke agi baru lalu nengah Menteri Dalam Menua Tan Sri Muhyiddin Yassin beratika undang-undang ke patut.
“Enti nyema iya patut ngaga ubah lalu dipejalai nitihka ke diguna kitai ngarap deka bulih asil ke positif,” ku iya rambau aum media ba opis DAP Sibu di Rejang Park kemari.
Taja pia, Irene meri jamin ngagai rayat iya nya sida (PH) deka bebendar nentuka penanggul rayat ulih diputar lengkas laban mayuh sida ke bepannggul tu raban anak mit.
“Dikena mutarka penanggul sekeda kes, aku udah nulis surat nuju Menteri Dalam Menua ke baru lalu ngarap ulih diperunding ke iya bekaul peminta anak mit ke nadai status peranak menua laban sida udah diterima sah apai indai peranak Malaysia.
“Kitai endang deka beratika pekara tu taja status peranak menua semina ulih diberi ngagai sida ke endang patut, aku minta kasih ngagai Opis Menteri Dalam Menua (KDN) berati baru peminta anak mit ke diambi nyadi anak iru enggau chara sah,” ku iya.
Ba pekara tu, Irene nganti komitis khas nengah Chong Chieng Jen di Miri kena 21 Mei tu tadi ditumbuh dikena mutarka penanggul tu.
“Pekara tu dibaruh bidang kuasa Opis Menteri Pengintu Pengelantang Pendiau, Orang Indu enggau Pengelantang Komuniti ba renggat perintah nengeri, kitai ngarap ulih bekerejasama enggau Dato Sri Fatimah Abdullah mutarka penanggu tu.
“Kitai ngarap ulih mutarka enggau naka ulih mayuh kes ke pemaik rayat lalu ngiarka bida penemu politik enggau niat ngemeratka pengidup rayat,” ku iya.