ENGKILILI: Kaban Kunsil Nengeri (ADUN) Engkilili Johnnical Rayong dekaka Pesta Engkilili dipasuk ba kalendar dagang temuai nengeri.
Ku iya lebuh dikerandau kemari, perambu sentang pekara nya deka dikenatai ngagai opis menteri dagang temuai.
“Pesta Engkilili sebengkah program alai kitai ngelaku adat, main asal enggau daya idup bansa Dayak kelebih agi Iban ke nguwan menua Engkilili.
“Nengah pesta tu mega, kitai ulih ngangkatka sosio ekonomi peranak ke diau ngelingi,” ku Rayong.
Iya nambah Pesta Engkilili 2018 ke baru tembu ensanus udah 3 kali diatur lalu seruran nerima timbal ke manah ari ijinsi perintah.
Pekit kumang entara seiti program ke bisi diatur rambau pesta nya malam Hari Lima tu tadi.
Gelar Kumang pulai ngagai Shirlyna Imma ari Serubah Ili, Lubok Antu ke alai iya nerima perais mata duit RM3,500.
Penuduk lumur dua enggau tiga pulai ngagai Easthereena Miloh enggau Jaylibna Glorya Jatai lalu seduai nerima RM2,500 sereta RM1,500.
Kelimpah mata duit, pemenang mega nerima perais bukai ke disua Rayong.