Kededua menua tu ngenggaika pemutus ti udah digaga EU ke deka nyekat tauka ‘boikot’ produk minyak sawit
KUCHING: Entara pekara ke nyadi pemerat dalam aum Menteri Besai Malaysia, Datuk Seri Mohd Najib Tun Razak enggau Presiden Indonesia, Joko Widodo ba atur pengawa ‘Rundingan Tahunan ke-12 Malaysia-Indonesia’ beserimbai enggau 60 Taun Kaul Diplomatik entara Malaysia-Indonesia, di Hotel Hilton ditu, kemari iya nya bekait enggau minyak sawit, alai pekara tu endang dikemerat ba ati rayat menua Indonesia enggau Malaysia.
Najib lebuh bejaku ba aum media kemari madahka, pekara tu bekait enggau pemutus ke digaga Gempung Eropah (EU) sentang minyak sawit, alai Malaysia enggau Indonesia sepenemu pekara tu berat sepiak lalu enda patut dipajakka laban empas nya ditapi urung 600,000,000 pekebun mit di Malaysia sereta 17.5 juta di Indonesia.
“Penatai pemisi sida enda tentu, sereta ngetu bansa nya aja, enti kitai enda ngemutarka penanggul tu.
“Pekara tu bisi udah dibai ngagai Presiden European Council di Manila bedau lama tu tadi, berindik ari atur ke digaga Malaysia, alai Menteri Kebun Bedandang Besai enggau Industri bisi udah betemu enggau duta-duta EU enggau Presiden Indonesia empu bisi deka bejaku pasal pekara tu di Jakarta dalam kandang berapa hari tu ila.
“Laban kitai sama-sama deka meda Malaysia enggau Indonesia bekerejasama mutarka penanggul tu,” ku Najib.
Ku iya nambah penanggul EU ke ngaga pemutus deka nyekat tauka ‘boikot’ minyak sawit ari kededua buah menua tu iya nya nyadi siti pekara ke serius.
“Kitai beratika pekara tu berat endar, lalu enggau naka ulih kitai deka mutarka penanggul tu ngambika bisi pemutus enda nagang industri minyak sawit,” ku iya.
Iya nandu baru madahka nyadi sebuah menua pengeluar minyak sawit sereta pemungkal ‘Council of Palm Oil Producing Countries (CPOPC) ke besai, kaul ke terit entara Malaysia enggau Indonesia nengah CPOPC nya berat ti mutarka sekeda empas dalam industri minyak sawit.
Dalam pekara tu, bedau lama tu tadi, kededua ketuai menua, Najib enggau Widodo nyambut timbal ari Aum Menua ke nyadi Pengeluar Minyak Sawit, ti digaga di Bali , Indonesia kena 2 November tu tadi, ti deka nyendiaka palan ngenegapka kerejasama enggau menua ke nyadi pengeluar minyak sawit, lalu muka jalai ungkup menua tu nyadi penyereta lalu nyadi kaban CPOPC.
Nambah ke nya, kededua ketuai menua tu betatika pemerat CPOPC dalam pengawa ngemansang, ngangkat, sereta ngenegapka kerejasama dalam kaul minyak sawit, lalu minta Sekretariat CPOPC di Jakarta majakka pengawa sida merambu sereta ngaga program ngangkatka imej minyak sawit dalam gaya ke positif ba tikas global.
Seduai mega bela madahka komitmen menua tu, pasal pemerat menua tu dalam Resolusyen Parlimen Eropah bekait enggau minyak sawit lalu sentang pekara pengawa nebang kampung ti ngenggaika minyak sawit banding enggau minyak sayur, alai ku sida kebun sawit tu meh ke ngasuh kampung ditebang.
Penemu kededua ketuai tu mega nyerumba diskriminasyen ke datai ari resolusyen nya ukai semina meri empas ke enda manah ngagai dagang tang mega ngerampit bejuta pengelantang pendiau sida ke gawa tauka bekebun sawit ke mit-mit di Indonesia enggau Malaysia.
Sebarang pengawa ke nyekat makit minyak sawit ukai mandangka komitmen komuniti global ngagai Pemujur Pemansang Pemerat Opis Bangsa-Bangsa Bersatu nitihka Agenda 2030 kelebih agi ba sukut ngemunaska meskin seranta sereta nambah penatai pemisi sida ke gawa sereta bekebun sawit.
Entara lansa bukai, ke bisi di baum kededua ketuai menua tu sereta nyapai (persetujuan) mungkur pekara baka kaul bilateral (kededua piak menua), ba tikas ke manah, mungkur pekara politik, ekonomi, pengawa rama, pengelikun enggau kerejasama garis menua.
Ba timbal Jokowi ngagai jaku Najib, iya madahka kededua Perintah Menua deka majakka pengawas sida iya ngemutarka sekeda pekara ke ulih digaga manah agi.
“Indonesia enggau Malaysia ngembuan kerejasama ke berat kelebih agi ba penegap komoditi minyak sawit nengah CPOPC (ke bisi udah disebut ulih Najib), iya nya kitai sepenemu dalam pekara tu laban penanggul empas ari EU nya meri empas ke negatif ngagai pekebun kitai baik nya di Indonesia tauka di Malaysia,” ku iya.
Ba lansa bukai, Widodo melabaka pengawa dagang entara Indonesia enggau Malaysia di suku keterubah taun tu, bisi udah nambah ngagai 21 peratus.
“Tu penambah ke chukup besai lalu kami (Indonesia) nyambut timbal tu enggau manah.
“Lalu baka nya mega, eksport Malaysia ngagai Indonesia nengah Entikong nyapai urung 25,000 ton (naka bulan Februari 2017) lalu Indonesia mega ngarapka Malaysia ulih nambah import sereta eksport menua tu,” ku iya.