PAKAN: Empat buah sekula primari ti besai di Parlimen Julau udah diperambu deka nyadi palan dikena ngempung semua sekula ba parlimen nya ke baruh kategori Sekula Kurang Nembiak (SKM).
Kaban Parlimen Julau Datuk Joseph Salang Gandum madah, ba parlimen nya bisi 43 buah sekula primari lalu ari penyampau nya bisi ditemu sekula napi penanggul tu.
“Taja pan tu semina perambu aja tang bala apai indai tau berengkah nyediaka diri baikka perambu nya deka dipenyadika enda lama agi tauka jemah ila,” pia ku iya maya bejaku ba Pengerami Makai Lemai Ninting Taun Sekula Primari (SK) Nanga Pakan di Pakan, kena malam hari Enam tu tadi.
Salang madah, perambu deka ngaga palan nya siti ari chara dikena nyediaka pelajar ke manah agi ti seririh enggau gaya ke pemadu kondusif ti bela disikap enggau perengka guna ti chukup baka makmal Sains enggau Teknologi Pemadah (ICT).
“Kitai deka meda nembiak sekula di kandang menua pesisir ulih belajar ba sekula ti ngembuan perengka guna enggau pelajar ti meruan ngambika sida deka bulih pemujur ba pelajar ti nentuka pengidup meruan dudi hari,” ku iya madah baru.
Ku iya, entara sekula ke napi penanggul kurang nembiak baka SK Buku, SK Nanga Pedanum, SK Ulu Pedanum, SK Nanga Ensiring, SK Nanga Jambu, SK Dayu, SK Kara, SK Ulu Entaih enggau SK Kota.
Kelimpah ari nya, SK Sembawang, SK Kedup enggau SK Manding bela napi penanggul ke sebaka.
“Sekeda sekula ti diperambu udah deka disegulaika iya nya SK Nanga Babai, SK Nanga Wak enggau SK Kara,” pia ku iya madah.
Salang madah, perambu deka ngaga palan ngempung SKM tu nyadi praktikal sereta deka datai ba tuju penumbuh kelimpah iya mega madahka diri udah mantaika beberapa bengkah penemu tauka perambu ngagai ex-Menteri Pelajar suba ti mega ex-Menteri Besai Tan Sri Muhyiddin Yasin bekaul enggau pekara nya.
“Tang di Parlimen Julau ditu, sebedau perambu nya dipenyadika, jalai alun ditu meseti dikemanahka dulu tauka meseti digaga.
“Kebuah pia, siti ari kebuah ke patut dulu agi dipeda iya nya maya nganjung anak ke belajar di prasekula ke agi mit laban sida empai nemu nganjung diri ke sekula enti enda dianjung apai indai.
“Pia mega, sida ke diau di buding sekula bela meseti diberi enggau perengka guna buding ke chukup sereta engkeman,” ku iya madah baru.
Ngambika nembiak lantang agi, ku Salang, iya andal amat perintah ulih nyediaka bas dikena ngambi nembiak sekula ari rumah panjai sereta nganjung sida pulai baru.
Berebak enggau pengerami nya, iya besemaya deka meri SK Nanga Pakan geran sepenyampau RM20,000 kelimpah RM5,000 agi ngagai prasekula sekula nya.
Dulu agi ari nya, Salang bisi niki Rumah Mandau Mangka di Sungai Maram ngulu pengerami pemesai begulai enggau rayat alai ba rumah panjai nya iya bela ngungkupka geran projek mit menua pesisir (MRP) sepenyampau RM273,000 ngagai 28 iti Komiti Pengelikun Enggau Pemansang Genturung Pendiau (JKKK) rumah panjai.
Awak nya mega dikena iya madahka perintah semampai ngemeratka pengelantang pengidup rayat lalu nyungkakka agi pengeransing nyediaka pemanah servis telekomunikasyen baka nambahka penyampau legit telekomunikasyen di menua pesisir.