KUCHING: Chairman Komiti Mutarka Penusah Ngenyit Nengeri (JPBN) Sarawak ke mega Sapit Kepala Menteri, Datuk Amar Douglas Uggah Embas kemari udah netapka sebuah agi kandang endur bisi igi penyakit ukui gila tauka Rabies, iya nya Kampung Kuala, Serian.
Naka kemari, penyampau semua kandang menua ke ditemu bisi igi penyakit Rabies iya nya bisi 23 buah genturung pendiau (nyengkaum Kampung Kuala, Serian).
Nya berindik ari bisi seiti kes baru iya nya kes ke-6, anak mit ti beumur 7 taun ke asal ari Kampung Kuala, Serian ti diripotka ensanus udah kala diketup ukui kena 17 Jun tu tadi lalu iya bisi nerima tiga dos tuchuk vaksin anti-Rabies ba Sepital Serian kena 21 Julai, 24 Julai enggau 28 Julai, lalu nembiak nya patut nerima dos keempat kena 4 Ogos tu tadi.
Taja pia, kena 1 Ogos 2017 nembiak mit nya tabin, batuk enggau mutah lalu dipasukka ngagai wad Sepital Serian. Pengerai iya ti majak kusut ti bisi ubah ba ulah sereta halusinasyen lalu iya dianjung berubat ngagai Sepital Besai Sarawak (HUS).
“Kes ke-6 tauka nembiak mit lelaki nya disahka dirampit igi penyakit nya pengudah sampel darah iya ke dianjung kena 8 Ogos 2017, nunjukka iya positif virus Rabies.
“Nembiak mit nya benung nerima perubat ba HUS, ti diripotka kritikal sereta bepanggai ngagai perengka bantu enseput,” ku penerang berita nya ke dikeluarka Sekretariat JPBN Sarawak.
Bepelasarka penerang berita sekretariat JPBN nya, naka kemari bisi 504 iku ukui udah dituchuk vaksin iya nya 74 iku ukui ba Bagi Menua Serian enggau 430 iku ukui ba 11 buah Kampung di Pelilih Menua Lundu.
Penyampau semua jelu ke dikerindu ke udah diberi vaksin nyentukka kemari bisi 29,098 iku nyengkaum 21,456 iku ukui; 7,597 iku mayau enggau 45 iku jelu bukai.
Opis Pengerai Nengeri Sarawak madahka bisi 115 kes ketup baru ke diriputka kemari iya nya 48 kes di Bagi Menua Serian; dua kes di Bagi Menua Sri Aman; 39 kes ba Bagi Menua Kuching enggau 26 kes ba Bagi Menua Samarahan.
Ari penyampau nya, bisi 99 kes mungkur kes jelu tupi iya nya ukui 52 kes, mayau 46 kes, monyet dua kes enggau babi seiti kes. Lalu nya nyadika penyampau semua ketup jelu naka kemari ti berengkah 1 April iya nya 1,869 kes.
Penyampau orang ke udah diberi tuchuk vaksin anti-Rabies iya nya bisi 857 iku.
Entara genturung pendiau tauka Kampung (Kg) ti udah ditetapka bisi igi penyakit berampit Rabies iya nya di Bagi Menua Serian baka Kg Krait; Kg Paon Rimu; Kg Paon Rimu Bakung; Kg Remun; Kg Lebor; Kg Saroban; Kg Tangga; Kg Ampungan; Kg Mentong Berawan; Kg Mentong Silaga; Kg Engkabang; Kg Tampek Sumpas; Kg Rasau; Pekan Siburan; Bandar Serian; Batu 45, Kuching-Sri Aman; Kg Temong Mura, Tebedu; Kg Entubuh, Tebedu enggau Kg Kuala, Serian.
Lalu ba Bagi Menua Sri Aman iya nya Rh. Janta Punggu Mawang sereta di Bagi Menua Kuching iya nya Batu 5, Jalan Semeba; Wet Market, sg Maong enggau Kg Serikin, Bau.