KAPIT: Kaban Kunsil Nengeri (ADUN) Bukit Goram udah bejadika gempuru tiga dalam satu ti diatur begulai Komuniti 1Malaysia (K1M) enggau Komiti Pemansang Enggau Pengelikun Genturung Pendiau (JKKK) Taman Indah di Jalai Sekirik, apin lama ke udah.
Iya ngarika Sapit Menteri Pemansang Menua Pesisir enggau Kandang Menua Malaysia Datuk Alexander Nanta Linggi ke mega Kaban Parlimen (MP) Kapit.
Gempuru tu diatur kelai nutup Gawai – Ngiling Bidai, Program Pemesai Begulai enggau Rayat enggau Program Negaraku K1M.
K1M Taman Indah nyadi ketuai ngatur lalu udah disereta tujuh bengkah K1M di pelilih Kapit.
Sekeda palan K1M ke bisi ngaul diri nyengkaum Taman Indah, Bukit Goram, Genturung Sekaban sepemanjai Jalai Puan Sri Tiong, Bukit Goram Sebabai Ulu Rumah Osman Minggan, Sungai Bena, Kampung Sawang enggau Pasar Kapit.
Bejaku ba mua bala mayuh, Jamit muji pemanah pengawa K1M enggau JKKK Taman Indah ti ngatur program chukup besai reti mantu ngempung sereta beserakup palan K1M dikena nerenakka pemanah kaul pupu bansa.
Iya berasai lantang meda K1M di pelilih Kapit chukup chakah bejalaika aktiviti ungkuo kaban iya ti mega nyediaka peluang ngagai sida bisi kaul rat enggau pengari rayat enggau ejensi perintah.
Sentang pekara politik, Jamit meri terima kasihka sukung tegap sida sereta nentuka BN menang rambau pengawa bepilih nengeri tu tadi kelebih agi ba penuduk baru Bukit Goram.
Iya minta rayat terus bediri teguh nyukung penyandang chalun BN di Kapit, Datuk Alexander Nanta Linggi ti deka ngetanka penuduk iya maya Pengawa Bepilih Besai (PRU) ke-14 tu ila.
“Nanta udah nyata dipeda seiku ketuai ti manah sereta udah bisi penegap ba tikas perintah besai enggau pangku pengawa ke diatu, Sapit Menteri Pemansang Menua Pesisir enggau Kandang Menua (KKLW).
“Kitai meseti meri iya mandat ngambi ulih nampung pengawa iya nentuka iya dipadu ba pangku pengawa ti manah agi, nyadi menteri,” ku Jamit seraya nambah Kapit udah bisi tim BN ti tegap sereta kering enggau semua penuduk ari baruh BN.
Ku iya, pengawa sida tu ulih nentuka kuing enggau pemansang pengidup dudi hari peranak di Kapit.
Ngelansa pekara pemansang, ku Jamit, bisi mayuh pemansang deka dipejalai nyengkaum projek jalai menua pesisir ari Nanga Mujong ngagai Tekat Ai Baleh sereta sekeda projek ti dikemendarka Kepala Menteri Datuk Amar Abang Johari Tun Openg rambau pejalai iya ngagai Kapit dalam bulan April taun tu tadi, nyengkaum ‘Kapit Town Square’, Pegung Lily, Tebing Ai Belaga ke lalu nyadi makit enggau Tebing Ai Song Renggat II.
Iya madah pengawa numbuhka ‘Upper Rajang Development Authority’ (URDA) ulih mantu ngenyampatka pengawa pemansang di Kapit enggau kandang menua ulu Rajang.
Berebak enggau pengerami nya, Jamit bisi ngemendarka geran perintah penyampau RM10,000 ngagai JKKK Taman Indah dikena belanja aktiviti rama sida. Iya mega bisi ngemendarka belanja dikena nyaup Opis Pemadah Kapit dikena meli set ‘PA system’.
Sama bisi datai Residen Kapit Joseph Belayong Punan, Chairman Pengatur ke mega Chairman JKKK Taman Indah Tang Bukok, Chairman K1M Kapit Ambrose Abong Bugek, Penulung Direktor Opis Betanam Betupi Badin Unol, sereta urung 300 iku temuai ke bukai.
Sekeda aktiviti ke bisi diatur nyerumba program tu nyengkaum Betabuh, pekit antara palan K1M, chabut tikit benasit enggau lagu karaoke.
Sama bisi bejaku rambau program nya Residen Kapit Joseph Belayong Punan, Ambrose Abong Bugek, Garai Entili enggau Tang Bukok.