MIRI: Mensia mayuh di Marudi nyengkaum temuai ke deka ngelawa pasar mit nya maya Regata Baram 2017 bepeluang nengah jalai ke udah dibelakin penyauh 14 ngagai 15 kilometer ke dipelaba dalam bulan Ogos.
Menteri Muda Kaunsil Kandang Menua Datu Dr Penguang Manggil madah pengawa nya endang agenda besai iya, nentuka gaya Jalai Miri-Marudi ulih ditengah engagu manah maya Regata Baram 2017 ke deka diatur belabuh 25 ngagai 27 Ogos ila.
Ku iya, taja semua jalai engka bedau tembu magang maya nya, tang dikearapka, setengan ari ari jalai nya ke urung 14 ngagai 15 kilometer nuju pasar Marudi ulih ditar enggau manah.
Udah nya, laluh iya deka diaraka enggau batu mit, dikena nyeliahka jalai lichin, lebih agi enti hari ujan.
“Aku meri jamin ngagai mensia mayuh nengah pengeransing, pengawa ngemanahka Jalai Miri-Marudi diatu bejalai enggau mujur lalu dulu ari pelin,” ku iya madah ngagai pemberita ba Opis Kereja Raya (JKR) Miri ditu, apin lama ke udah.
Dulu ari nya, iya bechairmanka aum keempat Pengawa Ngemanahka Jalai Miri-Marudi ba Opis JKR Miri.
Bela bisi datai Injinir JKR Miri Chong Chi Fam, Pemesai Pelilih Marudi Mackos Sibong sereta pengari sekeda ejensi ke bekaul sereta ketuai raban bansa.
Penguang ke mega Kaban Kunsil Nengeri (ADUN) Marudi madah, dikena nentuka pemujur pengawa ngetar jalai nya, piak kunteriktor dipelaba deka nutup jalai nya enda lama.
Ku iya pengawa nutup jalai nya enda lama iya nya sekali dalam sebulan tauka dua bulan, pengelama tiga ngagai empat hari bepanggai ngagai penyauh/.
Atur nya dikena nentuka jalai nya rata sereta ditar manah kelimpah nyamin pemanah iya, ngambi enda mudah rusak baka sebedau tu.
“Nya alai, iya minta kerejasama ari semua piak, lebih agi penguna jalai raya, maya jalai tu ditutup beberapa hari ila.
“Tu dikena nentuka pengawa nya bejalai enggau jampat sereta mujur,” ku iya.
Berebak enggau nya, iya mega nangkan penguna jalai rayat ngambika bejimat maya nengah jalai nya, lebih agi maya orang benung ngaduka jalai.
Enggau jaku simpul, ku Penguang, iya chukup tepantup ati meda pemujur pengawa ngemanahka jalai nya, seraya meri terima kasih ngagai piak JKR enggau kuntraktor kompeni CMS Road ketegal pengeransing sereta penau sida nentuka projek projek beungkus RM70 juta tembu enggau manah kena March 2019.
Ngenang pasal pengawa nampung Jalai Miri-Marudi dikena ngemuntangka pejalai ke Limbang lalu enda ibuh mansa adan Malaysia-Brunei enggau pos imigresen, Penguang madah iya nyukung penuh usul nya ngambika diterima sereta bulih pemendar.
“Nyema perambu nya diterima nyadi peranak Marudi endang orang ke pemadu gaga, laban jalai nya deka dipansukka dalam projek Jalai Besai Pan Borneo,”ku iya.
Penguang madah perambu deka nyambung Jalai Marudi rembus ke Limbang enggau Lawas, iya pechaya opis menteri benung beratika perambu nya.
Apin lama ke udah Menteri Kereja Raya Datuk Seri Fadillah Yusof madah, opis menteri nya benung bejalaika pansik teknikal bekaul enggau perambu besambungka Miri, Limbang enggau Lawas nengah Marudi lalu nampung Jalai Miri-Marudi rembus ke Limbang ke lalu mansa Mulu.