SIBU: Bala guru kuntau ba sitak tu diperansang ngambi numbuhka sebuah gerempung dikena ngemuntangka agi pengawa perintah nyaup sida.
Sekretari Politik Ngagai Kepala Menteri Edwin Banta madah, tu sebengkah ari jalai dikena nyaup bala guru kuntau Iban bela ngemansangka sereta ngetanka main asal bekuntau.
“Kitai temegah ati laban diatu pengawa bekuntau majak dikerindu tang seraya nya sida tu meseti disaup.
“Nya alai, kitai ngarapka bala guru kelebih agi di Sibu ditu ulih begempung nengah seiti gerempung ngambika perintah lantang nyaup sida seraya ngemansangka main lama Iban tu,” pia ku iya madah.
Iya mantaika jaku tu maya datai ngulu pengawa tembu kuntau nembiak guru Nading Tambi ke diatur ba kelang kuntau besemak Jalai Salim ditu, empai lama tu tadi.
Awak tu mega dikena Edwin meransang bala mayuh anang sanggu belajar bekuntau laban ku iya pengawa lama tu ukai semina dikena ngintu pengelikun tubuh diri tang bela nerenakka disiplin ba diri empu.
“Seraya kitai deka meda pengawa tu diangkatka ngagai tikas ti tinggi agi kitai ngarapka enda milih tuai tauka biak bela besaup ngetanka pengawa lama bansa kitai Iban tu.
“Anang enggai belajar enti bisi awak belajar ke besemak enggau kita,” ku iya madah baru.
Ba pengawa tamat nya, guru Siang betuaika sida ngatur pengawa nitihka adat asal tembu kuntau.
Guru Siang enggau guru bukai baka guru Lan enggau guru Jemat ti bela datai maya tu bela dipebasa mantaika kuntau sida.
Pengawa tu dikena ngelai 16 iku nembiak guru Nading tamat belajar tiga iti bungai kuntau iya nya Spring 36, Bungai Tembung enggau Bungai Satu.
Dikena mantaika sukung iya ngagai pengawa tu, Edwin bisi nyuaka pemeri RM2,000 kelimpah besemaya deka nyaup meli kereban betabuh dikena sida tamat kuntau nangkan ke tu ila.
Ba pekara ke bekaul, guru Siang bela ngatur pengawa tembu kuntau 28 iku nembiak iya ba Batu 16, Jalai Sibu-Bintulu kena 12 Februari ti deka datai.