MIRI: Kongres Serakup Orang Gawa Perintah (CUEPACS) Sarawak nyukung penuh atur pengawa Kepala Menteri Datuk Amar Abang Johari Tun Abang Openg.
Sekretari iya, Omar Bahrein Unin madah pengawa nyiri Abang Johari nyadi Kepala Menteri keenam deka nampung pengawa pemansang enggau pengelantang peranak Sarawak.
“CUEPACS Sarawak andal Abang Johari deka nampung legasi ditinggal niang Tok Nan ti ngemeratka servis enggau pekara pengelantang rayat,” ku iya madah ngagai Utusan Borneo kemari.
Cuepacs Sarawak ku iya bisi kaul ke chukup manah enggau perintah nengeri kelebih agi bekaul enggau pemerat pekara orang gawa perintah di nengeri tu.
Nitih ku iya, taun nyin tadi sida udah ngatur penemuai meri basa ngagai niang Tok Nan lalu bisi berandau bekaul sekeda pekara pemerat orang gawa perintah.
“Cuepacs andal Abang Johari deka meruan ngetanka pemanah kaul tu lalu iya mega seiku orang ti endang rat kaul enggau orang gawa perintah laban suah ngulu program ke diatur ejensi perintah enggau ke bukai,” ku iya.
Omar madahka Abang Johari ngembuan peneleba besai dalam politik lalu kala gawa perintah sereta meretika pangku pengawa enggau batang pengawa sida.
Pia mega, Cuepacs nyadi kongres ti negika pekara pengelantang orang gawa perintah ngandalka pemanah kaul tu ulih ditan sereta perintah nengeri nyaup orang gawa perintah dalam sekeda isu.
Sekeda ari isu iya nya ungkus belanja pengidup ke majak tinggi, pengawa berumah, kuarters perintah, elawin gawa perintah sereta sekeda pekara ke bukai.
Bisi 13 bengkah gerempung sekereja ti ngaul diri enggau Cuepacs di Sarawak sekeda ari nya Gerempung Bala Pengajar, Pengerai, Pengawa Betanam Betupi, Opis Kereja Raya (JKR), Kastam, Makmal, Kaunsil Menua, Kaunsil Ai enggau ke bukai.