MARUDI: Menteri Muda Kaunsil Kandang Menua, Datu Dr.Penguang Manggil meri terima kasih ngagai Tuai Rumah Dorista Jambo enggau sekeda tuai rumah panjai besemak menua Tinjar enggau Beluru ti udah meri sukung penuh sereta arapka iya nyadi pengari Barisan Nasional (BN) ba Sitak Marudi sereta mega pangku pengawa nyadi Menteri Muda Kaunsil Kandang Menua di Sarawak.
Iya mega pechayaka sukung enggau kerejasama rat ari semua rayat ngagai bala ketuai perintah BN Sarawak, lalu iya ngelalau ukai mudah orang pechayaka jaku tuduh ari raban parti penyakal tauka sekeda opis bekuasa bukai ti semina deka beambi ulih ungkup diri empu aja. Datu Dr.Penguang ti mega Kaban Kunsil Nengeri (ADUN) Marudi, besemaya deka bebendar mutarka penanggul ditapi rayat di Marudi.
Tandu iya, iya enggai besiping ngagihka Projek Mit Pemansang Menua Pesisir (MRP), enda ngira bansa, main asal, enggau jalai pengarap.
“Tu agih belanja perintah BN, lalu aku deka meri nitihka ti dea diguna rumah panjai nya. Seriris enggau pekara tu, bala rayat patut liat ati nganti agih belanja sida lalu tu deka diberi berenggat,” ku iya.
Datu Dr.Penguang Manggil mansutka jaku tu ba Pengerami Pemesai Begulai Enggau Rayat sereta Bejadika Jalai Batu ba Rumah Dorista Jambo, Sungai Selunok, Kerat, Ulu Teru kena pagi Hari Minggu nyin tadi.
Datu Dr.Penguang minta semua komuniti di sitak Marudi ti udah tempawah singkang rambau PRN suba, nikal pulai lalu beserakup ari baruh iring ketuai perintah BN ngambika sida nyadi tim ti tegap lalu penyakal enda mudah nguna sida. Badu agi ingatka semua penanggul enggau penyerekang penemu sebedau tu. Teranak baru kaul rat lalu begulai mai pemansang ngagai Marudi ungkup pemaik rebak dudi ila.
“Mansang lalu betemu enggau aku, padahka penanggul ti ditapi kita nengah chara ti betul sereta profesional. Aku sedia mending sereta deka mutarka penanggul nya enggau jampat.”
Iya besemaya deka mai ubah ba pemansang ungkup pemaik Marudi enda ngira bansa enggau jalai pengarap.
“Guna awak tu sereta begempung seagi aku agi nyadi pengari BN kita.”
Ba pengerami nya, Datu Dr.Penguang bisi ngemendarka geran MRP ari Perintah Besai sepenyampau RM100,000 ngagai Rumah Henry Gomes, RM100,000 ngagai Rumah Kompeni Agon, RM50,000 ngagai Rumah John Merikan, RM65,000 ngagai Rumah Kalong Goh, RM50,000 ngagai Rumah Ruwang Tang, RM40,000 ngagai Rumah Jana Rayong, RM50,000 ngagai Rumah Douglas Bungan, RM20,000 ngagai Rumah Sara Angul sereta RM30,000 ngagai Rumah Dorista Jambo.
Dulu agi ari nya, Datu Dr.Penguang udah diberi basa bejadika jalai batu rumah panjai nya ngena belanja diberi Kaban Parlimen (MP) Bintulu, Dato Seri Tiong King Sing.
Sama bisi datai, Datin Monica Ukong Jaya, Sekretari Politik Kepala Menteri Sarawak, Alexander Asing John Sadai enggau Tuai Rumah Dorista.