MENGKANG DIINTU: Keruntuk pala ti digitang ba ruai ba Rumah Nyuka.
SIBU: Pala Munsoh nama menua tu engka deka ngasuh bulu nyeregu lebuh keterubah ninga nama nya.
Nitihka jerita lama, sida ngayau ngena endur nya ngansah ilang sereta ngelitikapala munsuh pengudah sida Ngayau maya pengawa ngayau agi dikemeran dulu menya.
Tang sida enda patut bisi penangi ngelawa ai wong nyema sida bisi awak ngusung menua nya.
Urung sejam 15 minit pengelama pejalai tama kampung ari Rumah Nyuka Itam ba Lubuk Lemba di Ulu Sarikei, Wong Pala Munsoh ngembuan pemanah rampa menua asal ti tau dikayam.
Chairman Program Homestay Rumah Nyuka, Ikau Aji madahka pejalai ngelawa ai wong tauka tebilang agi dikangau Sungai Munsoh nyadi pematak ti dikembuan ba pakej homestay sida.
“Bala datai ngagai Ai Wong Pala Munsoh tauka Ai Wong Sungai Pau deka mansa kebun lada enggau madang getah sebedau pejalai ngerenchah kampung,” ku iya madah ngagai Borneo Post.
Dilanchar kena 19 Ogos 2008, Program Homestay Rumah Nyuka dipujurka 19 buah ruang bilik ba 45 pintu rumah panjai nya lalu udah nerima urung 2000 iku temuai naka ke diatu, ku Ikau.
Ku iya, penyampau nya nyengkaum temuai datai ari menua tu enggau menua luar, nyengkaum ti nemuai pulai hari enggau bisi sekeda bemalam.
“Rumah panjai tu nyadi pengemeran keterubah program homestay ti dikenukuka Opis Menteri Dagang Temuai dalam Bagi Menua Sarikei.
“Rumah panjai tu agi ngena langkar asal ti digaga ari kayu tebelian kenyau digaga dalam taun 1955,” ku iya.
Ku Ikau, bala pesereta homestay bulih penatai pemisi ti manah ari program nya kenyau dilanchar.
“Program homestay kami udah ngasuh rumah panjai kami jelai rita ngagai komuniti dunya,” ku iya.
Temuai ti datai ngagai Rumah Nyuka deka mayar RM10 (orang besai tuai) lalu RM5 (nembiak sekula).
Bayar ti bebida ba pemakai, ai irup, penyikap perengka guna, bejalai ngabas kebun lada enggau madang getah sereta ke bukai.
Barang sapa ti bisi ati deka nemuai ngagai Rumah Nyuka tau betelefon ngagai Ikau Aji ba lumur 019-468 7518.