PAJAKKA BELAJAR: Jabu (empat kiba) nyuaka surat chiri mangku pengawa ngagai seiku raban komiti exco DAM ke bela dikemataka Serawa (empat kanan).
MIRI: Bala anak ari pupu bansa Dayak agi jauh tinggal di belakang dibanding enggau pupu bansa bukai baka Melayu enggau China, ku Sapit Kepala Menteri, Datuk Amar Douglas Uggah Embas.
Iya madah penanggul nya ukai semina nyadi menua pesisir aja, tang nyengkaum di nengeri.
“Bala anak kitai Dayak agi mayuh begunaka bantu ngulihka pemanah ba pengawa pelajar.
“Aku suah endar udah meda ruang bilik kitai Iban ti ngembuan adat pesaka ke berega endar tang ‘runtuh’ nyerak rebak sida ditangkanka enggau rebak dudi ari nya nya laban nadai pelajar ke manah.
“Dalam dunya moden diatu, pelajar nya siti kuasa ke beguna amat. Nya alai, semua orang patut nguna peluang ke bisi diatu, ngulihka pelajar ti pemadu tinggi,” ku iya madah nengah teks jaku iya ti dibacha ex-sapit kepala menteri Datuk Patinggi Tan Sri Alfred Jabu Numpang, ti mega nyadi patron Gerempung Dayak Miri (DAM), ba pengawa makai lemai meri terima kasih sereta nyiri raban komiti baru DAM.
Berindik ari nya, Uggah minta komuniti Dayak fokus lalu ngatur strategi nyemetak agi, kelebih agi ba pekara ngangkatka pelajar enti sida deka dibasa bansa bukai.
Uggah nandu baru, perintah seruran mantu rayat enda ngira pupu bansa, gerempung tauka komuniti asalka sida sedia sereta komited deka bekerejasama enggau perintah ngangkatka pelajar dalam komuniti sida empu.
Nengah awak nya mega, Uggah ngelalau Gerempung Ukai Dikuasa Perintah (NGO) mantu ngangkatka tikas pelajar bansa Dayak.
“Aku minta NGO baka DAM sereta sida ke bukai ke bisi di menua tu, berunding panjai bekaul enggau agenda pelajar, ti dikemeratka dalam misyen enggau visyen sida.
“Tu setipak enggau pengingin kitai deka meda mayuh agi nembiak bansa Dayak, kelebih agi ari sekula menua pesisir nyengkaum sida ti datai ari ruang bilik ke kurang penatai pemisi, mujur dalam pelajar lalu nyapai pemujur dalam akademik,” ku iya.
Ba pengerami nya, Jabu ngarika Uggah nyuaka belanja RM50,000 ungkup wang turu DAM.
Sama bisi ngulu pengerami nya, Menteri Muda Perengka Pengangkut Darat enggau Langit sereta Pengelikun ti mega Menteri Muda Dagang Temuai Datuk Lee Kim Shin, ADUN Telang Usan, Dennis Ngau nyengkaum tuai pemesai bukai sereta Presiden DAM, Serawa Budol.