NGERANDANG JALAI: Lau (enam kiba) enggau bala bukai sebedau merau ari penyangkai Pasar Selangau ngelawa Rumah Linggi.
SIBU: Sungai Batang Mukah, Selangau ditu engkeman dikemanahka agi ngambika ulih nyadi seiti ari produk dagang temuai sitak Sibu.
Sapit Chairman Opis Kaunsil Menua Pesisir Sibu (SRDC) Robert Lau Hui Yew madah, sungai tu bisi penau alai ngaga pengawa berakit tauka ‘kayak’ ti dikerinduka mensia mayuh nyengkaum ari menua luar.
“SRDC meda sungai tu chukup pemanjai sereta engkeman diangkatka kitai manah agi tauka diintu enggau chukup ngambika engkeman alai ngaga program baka berakit enggau ‘kayak’.
“Tang semua tu ulih nyadi magang enti bisi kerejasama bala mayuh ukai semina ari piak SRDC aja,” pia ku iya maya berandau enggau pengarang berita, kilah ensana.
Dulu agi ari tu, iya betuaika raban SRDC bejalai meda sungai nya ti mega nyadi seiti ari pengawa piak sida ke deka nyeleti program maya Pesta Selangau ti deka datai.
Lau madah, sebedau tu sida merambu deka ngatur pengawa berakit tauka ‘kayak’ ba sungai nya ketegal deka ngangkatka tikas pemanah Pesta Selangau ari ke sebedau tu.
Ku iya, pengerami nya ngelama tu baka selama iya nya suah agi mantaika program baka bejual pemakai, karaoke, ‘funfair’ tauka program ke bukai.
“Ari nya, piak kami nguji deka nambahka agi program beserimbai enggau Pesta Selangau kelimpah nyaup ngemansang dagang temuai ngambika ulih matak penatai mensia mayuh ukai semina ari menua tu empu tang dikearap tau digulu orang ari menua bukai,” ku iya madahka baru.
Agi nandu pengawa SRDC ti deka ngatur pengawa berakit ba sungai nya, ku iya, iya empu deka nganjung beberapa bengkah iti video enggau gambar sungai Batang Mukah ngagai sida ti ngemeratka pengawa berakit enggau ‘kayak’ di Kuching kelimpah deka mai sida nya nemuai ngagai sungai tu empu.
Iya madah, pengawa iya nya nerima timbal ti manah alai sida nya besemaya deka bekerejasama nyema sungai Batang Mukah engkeman digagaka program nya.
“Kelimpah ari nya, kitai ditu empu tau nguji ngerandang jalai bebuaika belanja mimit ngaduka pengawa ditu.
“Ambika chunto, diatu Padawan udah dikelala alai ngatur pengawa berakit (Padawan Raft Safari) tang nya ukai muntang, piak ti bekaul dia bekenaka urung 10 taun sebedau datai ba tikas baka ke dipeda diatu.
“Pia mega kitai ditu, kitai ulih bechuntoka sida,” pia ku iya sambil madahka diri andal ati meda juluk ati nya tau nyadi nyata taun seiti ti deka datai.
Lau madah, diatu pemujur juluk ati nya bepanggai ba mensia mayuh ditu empu.
Iya mega ngarap bala mayuh ba baka di Selangau lebih agi baka bala kaunsilor begempung enggau pangan diri bakani deka ngangkatka Sungai Batang Mukah engkeman alai ngatur pengawa berakit enggau ‘kayak’.
Berebak enggau tu mega iya ngelalau mensia mayuh anang bebuaika uras ngagai sungai nya dikena ngintu pemanah rampa menua kelimpah nyeliahka ai sungai kelalu keruh.
Ngenang Pesta Selangau, iya madah, mensia mayuh baka ba Selangau tauka menua ke dipegai SRDC tau belabuh ari diatu ngaga rakit sida.
Ku iya, rakit muntang agi digaga laban ke ulih digaga ngena buluh bebida enggau ‘kayak’.
Lau madah, nyema nadai penanggul, SRDC deka ngatur pengawa berakit tu beserimbai enggau Pesta Selangau ba bulan Disember ti deka datai.
Pengawa tu ku iya, deka berengkah ari Rumah Linggi Lakom alai sida ke ngambi bagi bekenaka urung sejam setengah berakit sebedau datai ba pasar Selangau.
“Dikena ngemujurka program, SRDC deka nyaup Rumah Linggi nyemin jalai pendai sida ngambika mensia mayuh muntang agi nurun ke pendai sebedau program belabuh,” ku iya madah.
Taja pan baka nya, enti deka ngaga program tu besai agi ngambika ulih digulu orang bukai ari menua luar, penyauh tu bedau chukup.
“Nya alai, kitai deka bejalai ngelawa Rumah Siling (ulu Rumah Linggi) meda ulih ke enda rumah panjai nya digagaka palan alai program tu berengkah.
“Enti ari Rumah Siling, penyauh ngelawa pasar Selangau iya nya urung empat jam,” pia ku iya nambah baru.