DI SABAH JAKU KOMUNITI UDAH DIAJAR DI SEKULA: Uggah mendingka penerang ari pengari ari Sabah.
SANTUBONG: Malaysia bejalaika polisi pelajar ti liberal lalu komuniti bukai diberi peluang ngajar jaku sida iya empu tang agi ngemeratka jaku Bahasa Malaysia nyadi jaku Kebangsaan.
Kepala Menteri Datuk Patinggi Tan Sri Adenan Satem madah, kitai patut ngemansangka pelajar sereta sistem sekula nyengkaum rampa menua, ti ulih dikenataika ngagai tetiap iku nembiak redak menua kitai enda ngira penatai pemisi, asal sereta jalai pengarap.
“Di Sarawak bisi ngembuan urung 27 komuniti etnik, lalu tu ke ngaga komuniti kami besai enda ngira dalam adat enggau pesaka. Bagi ungkup komuniti Dayak aja bisi mungkur komuniti Iban, Bidayuh enggau Orang Ulu udah manggai urung 40 peratus ari pemayuh mensia ke diau di Sarawak.
“Kami ngangkatka pemesai adat pesaka kami. Kami temegah ati, taja pan pemesai adat pesaka kami tu, rayat Sarawak ke datai ari mayuh macham adat sereta jaku nerima lalu bebasaka adat pesaka pangan diri.
“Semina di Sarawak ditu, kami ngangkatka ‘Penyerakup Ari Bemacham Sukut’ setipak enggau rambai jaku 1Malaysia,” ku Adenan madah nengah teks jaku iya ti dibacha Sapit Kepala Menteri Datuk Amar Douglas Uggah Embas lebuh ngepunka atur pengawa Konferens Orang Asal Malaysia ba Pelajar Kedua (MIPCE II) semak ditu, kemari.
Iya nandu baru, bala anak orang asal di Sarawak, nurun sekula enggau pengeraja adat pesaka sereta jaku sida iya.
“Sistem pelajar kitai patut nyendiaka peluang ke adat bansa tu dikemansangka. Adat pesaka nyadi penegap, laban iya mantu ngempung identiti kitai. Kitai deka meda adat pesaka, nyengkaum jaku kitai, nyadi pekara ke mantaika penatai asal kitai.
“Di Sarawak, kami bisi sekula China, enda ngira sekula Perintah tauka peribit, ke sama nerima sukung ti tegut ari dalam sereta luar komuniti China. Mayuh apai indai ke bebansa bukai nganjung anak sida ngagai sekula China, sereta ngulihka penguntung ari pelajar jaku China ke ngembuan standard ke tinggi,” ku iya.
Iya mega bisi ngelansa bekaul pemujur Tun Jugah Foundation (TJF) begulai enggau Yayasan Main Asal Dayakl (DCF) ke bela udah ngangkat ke jaku bansa Iban lalu bisi seiti Kamus Iban-English ke ulih nyadi referen pupu bansa.
“Jaku Iban diatu diajar di sekula, kolej enggau universiti. Bedau lama tu tadi, Yayasan Main Asal Dayak (DCF) enggau Tun Jugah Foundation (TJF) begulai nyelak kamus Iban-English digagaka nyadi surat jaku Iban, sereta tau dikena pupu bansa bukai ke deka belajar Jaku Iban,” ku iya lalu ngelalau komuniti bukai nunda pemujur komuniti Iban ngaga surat pasal jaku sereta dialek sida iya.
Iya nandu baru madahka, di Sabah, sida mega bisi jaku komuniti sida empu ti diajar ba pra-sekula, baka jaku Iranun enggau Kadazan Dusun.
“Di Sarawak, kami bisi Pra-sekula enggau Tadika pesaka komuniti Bidayuh, lalu kami mega bisi bup ke ngena jaku Bidayuh. Lalu baka nya mega baka di Semenanjung, alai Jaku Semai diajar di sekula ari Taun 1 ngagai Taun 6 (dalam taun 2015), Jaku Kadazandusun, baka Jaku Iban diatu diajar ari Taun 1 ngagai Pom 5 di sekula, kolej enggau universiti,” ku iya.
Kelimpah ari nya, Adenan madah aum bekait enggau Pelajar Orang Asal Malaysia (Malaysian Indigenious Peoples Conference on Education tauka MIPCE) ke-2 patut endar digaga di Sarawak ke sekali tu, laban Sarawak ngembuan ke pegabis besai Orang Asal entara semua nengeri di Malaysia, alai bisi urung 27 komuniti etnik ke diau ditu.
Sama bisi nguluka atur pengawa nya, Speaker Dewan Rakyat, Tan Sri Datuk Seri Panglima Pandikar Amin Mulia, Sapit Speaker Kunsil Nengeri, Dato Gerawat Bala, Menteri Nembiak, Lumba enggau Main sereta Solidariti ti mega nyadi Penyanding Penemu Gerempung Dayak Bidayuh Nasional (DBNA), Dato Sri Michael Manyin anak Jawong, pengari United Nations International Children’s Emergency Fund ngagai Malaysia, Marianne Clark-Hatting enggau pengatur chairman atur pengawa tu, ti mega nyadi presiden DBNA Datu Ik Pahon Joyik.