Dikarang Judan Bungap//
NGEMANSANG DAYAK DUDONG: Julius (duduk, lima kiba) enggau bala raban PDD ke bukai maya aum penumbuh PDD ke diatur ba sebengkah hotel di Sibu, empai lama tu tadi.
SIBU: Serakup Dayak Dudong (PDD) deka nunda singkang gerempung Dayak ke bukai ba nengeri tu ti chakah deka ngemansangka bansa diri.
Taja pan baka nya Presiden PDD Julius Enchana, terang madahka gerempung sida enggai nyempulangka tuju penumbuh gerempung enggau pengawa politik.
“Sema bala raban ti bisi megai pangku pengawa ke besai dalam PDD bisi ati deka enggau bepilih tauka mangku pengawa besai ba parti politik, sida dipinta nyurutka diri ari pangku pengawa ti dipegai dalam PDD,” pia ku iya nerang.
Iya mantaika penerang tu maya nimbal tanya rambau aum penumbuh PDD ke diatur ba sebengkah hotel ditu, empai lama tu tadi.
Nandu jaku iya baru, Julius madah, seraya ti deka ngemansangka bansa, PDD mega ditumbuhka ketegal deka nempa kaul ti manah ba raban bansa Dayak enda ngira umur, jalai pengarap, etnik enggau penemu politik.
“PDD deka nandu pengawa tauka ulah beserakup ke endang udah dikemeranka bansa Dayak kenyau ari kelia.
“Nya alai ari penyerakup PDD deka ransing meda Dayak mansang baka bansa bukai,” ku iya madahka baru.
Nambahka nya, iya mega nerang enggau nyemetak madahka PDD sebengkah gerempung ti mit tauka gerempung ba pelilih menua aja.
Ku iya, taja pan mit PDD ngembuan juluk ati ti besai lebih agi baka nyaup pemansang pelajar nembiak sekula ba pelilih Dudong.
“Lalu seiti ari pengawa ke deka dikereja kitai iya nya deka ngiga orang ti landik meri peransang pelajar ngagai nembiak sekula ba kitai ditu.
“Pemansang ba sekula nyadi sebengkah ari batang tuju gerempung tu ditumbuh,” pia ku iya madah.
Berindik ari nya, Julius enggau jaku ti andal madah, raban sida deka nitihka rambai jaku PDD iya nya Begempung, Beserakup, Sa’ati, Sepenemu (BBSS) dikena ngemujurka tuju gerempung.
Berebak enggau tu bala tuai rumah ari Dudong ti bela ngulu aum maya tu meri jaku puji ngagai penumbuh PDD laban ba penemu sida gerempung tu ngempung rebak baru ti rinduka pengawa ngemansang sereta angkun ke bansa diri.
Sebengkah jaku lalau ti bisi dipansutka bala tuai rumah iya nya ngarapka PDD ulih ngereja tuju gerempung enggau bebendar laban ari pengeransing nya mai tuju ke manah ngagai bansa diri.
Sida mega besemaya deka meransang bala nembiak ba rumah panjai ke dipegai sida bela ngerejista nyadi raban PDD.
Bela bisi datai maya tu iya nya Sekretari Besai PDD Pau Utek.