Kelebih agi ngemanahka penyikap perengka guna ba sekula di kandang menua tu
MIRI: Pengawa mantaika Bajet 2017 kena 21 Oktober tu ila dikearap ngemeratka agi pemansang menua pesisir kelebih ngemanahka penyikap perengka guna sekula.
Kaban Parlimen (MP) Sibuti, Ahmad Lai Bujang ngaku mayuh sekula ba menua pesisir mengkang enda chukup perengka guna sereta udah kelalu tuai sereta begunaka perati ari perintah ngambi ngemanahka penyikap perengka guna ke bisi diatu.
“Kitai berasai sinu bisi sekeda sekula di menua pesisir nadai bekal ai enggau elekterik sereta mega perengka guna bukai baka struktur begunan sekula mega udah kelalu tuai sereta enda likun agi,” ku iya lebuhka dikerandau ba opis iya kemari.
Iya madahka pengandal sekali tu iya nya Bajet 2017 nguing agi ngagai pemansang sekula kelebih agi dalam pengawa ngemanahka begunan kuarters pengajar sereta perengka guna bekal ai enggau elekterik.
“Ambika chunto ba sitak dipegai aku bisi 25 peratus sekula menua pesisir agi dikumbai enda chukup perengka guna sereta kelalu tuai agi begunaka agih belanja ti besai dikena ngemansang sekula ngambika likun agi sereta moden,” ku iya nyemetak.
Iya empu nyukung juluk Menteri Besai, Najib Razak enggau Kepala Menteri, Datuk Patinggi Tan Sri Adenan Satem meri pemerat ngagai pemansang menua pesisir baka bajet sebedau tu.
“Aku andal kededua ketuai kitai tu meri pemerat ngagai pemansang menua pesisir lalu sebagi ari nya ngemanahka perengka guna sekula diatu ti patut dikemataka,” ku iya nerang.
Ahmad Lai ngaku bisi 30 ngagai 40 peratus bajet 2016 udah diagih ngagai pemansang sekula menua pesisir tang penyampau nya bedau chukup ketegal mayuh sekula agi chukup perengka guna sereta kelalu tuai.
“Pengandal kitai iya nya agih belanja besai agi deka diagih dalam pekara pelajar ukai semina ba pemansang fizikal aja tang mega peminta ke bukai ungkup pemansang sekula menua pesisir,” ku iya.
Ku iya, perintah bela ngagihka bantu ngemanahka atap, ngaga kantin enggau ngemanah kuarters bala pengajar ti luya.
Taja pia ku iya, enti sema ulih tangkup perengka guna tu patut dikemanah ngambika penanggul ti bekaul sekula ti mudah kelalu tuai enggau begunan sekula enda likun diputar dalam timpuh panjai.