Sida dipinta suah agi bejalaika pengawa munaska nyamuk aedes baka nyembur ngena asap
// Dikarang Jacqueline R. David //
PUNASKA PALAN AEDES: Dr Jerip nanam bungai nyadika kelai Projek Ikon Pelilih Menua (Kategori Genturung Pendiau) di Pelilih Mit Padawan ba Kampung Annah Rais, kemari.
KUCHING: Semua sida ke gawa ba Opis Kaunsil Kandang Menua (PBT) dilalau enda tau enda nurun bejalaika pengawa munaska nyamuk aedes kelebih agi ba sitak ke udah dikelala mayuh endur nyamuk aedes tauka dikumbai ‘tumpuk angat’.
Menteri Muda Pengerai Mensia Mayuh Datuk Dr Jerip Susil madah, tu berindik ari kes tabin ketegal denggi udah nambah dua kali ganda ditu ke taun tu dibanding enggau taun seiti nyin kemari, lalu enti iya enda diputarka jampat, iya tau ngenataika penyakit Zika di menua tu.
“Semua PBT baka Kaunsil Mengeri Kuching Selatan (MBKS), Kaunsil Mengeri Besai Kuching Utara (DBKU) enggau Kaunsil Mengeri Padawan (MPP) patut betatika pekara tu enggau berat sereta silik.
“Pengawa ngemunaska nyamuk aedes patut suah agi digaga, ambika chunto baka nyembur ngena asap ba sitak ke ditemu mayuh nyamuk,” ku iya.
Iya madah munyi nya lebuh dirandau ba pengawa bejadika Projek Ikon Pelilih Menua (Kategori Kampung) Pelilih Menua Mit Padawan di Kampung Annah Rais ditu, kemari.
Sama bisi enggau ngulu pengawa nya, Pemesai ba Opis Pelilih Menua Mit Padawan, Rangen Jamang enggau Ketuai Kampung, Annah Rais Alex Man Nya.
Dr. Jerip ti mega nyadi Kaban Kunsil Nengeri (ADUN) Mambong, madahka bisi tiga iti sitak tumpuk angat ke ditemu di Kuching iya nya Demak Laut, Bukit Siol enggau Kampung Tabuan Melayu.
Semua sitak nya, ku Dr Jerip, ngerikod kes denggi ke pemadu mayuh.
Iya nandu, di sitak Demak Laut, kebuah kes denggi nyadi laban gaya parit begunan kedai komersial dia benung digaga ngujungka nyamuk aedes mudah betelu.
Ba Bukit Siol ke nyadi sebuah sitak setinggan ku iya, sereta Kampung Tabuan Melayu, iya madah penanggul bepun ari ulah mensia mayuh ke diau di sitak dia enda ngemeratka pemeresi genturung pendiau sida.
“Penyadi tu ngirauka ati laban palan nya udah ditemu endur nyamuk aedes betelu lalu enti ketiga-tiga sitak dikeibuh tentu kes denggi ditu majak nyadi, lebih agi semak ujung taun tu selalu iya musim ujan,” ku iya serata madah kes denggi di nengeri tu bisi nambah 20 peratus dibanding enggau timpuh ke sebaka taun nyin kemari.