Sida tu beguna amat mantu raban penyaga pengelikun nentuka menua seruran likun sereta lantang
SELANGAU: Tanggungpengawa Opis Volunteer Malaysia (RELA) majak beguna dalam mantu raban penyaga pengelikun nentuka menua tu seruran likun sereta lantang.
Menteri ba Opis Menteri Besai Datuk Joseph Entulu Belaun madah, RELA diatu nengah arus transformasiyen nuju sebuah opis ti beberita sereta tegap.
“Diatu, RELA ukai semina numpu ngagai penyadi ke nuntung sebarang maya tang mega mungkur pengelikun, pengelantang, penyenang, pemaik, penyerakup enggau begempung.
“Tang RELA mega bejalaika tanggungpengawa sida enggau bantu meri darah dalam mantu nyelamatka seput orang bukai ti beguna bantu kelebih agi maya bisi penusah ngenyit,” ku iya.
Entulu madahka, tujuh pengawa numbuhka RELA dikena ngempung rayat ti nyadi mata enggau pending perintah ngenataika penerang berkaul enggau pengawa ti tau ngeruga pengelikun enggau pengelantang bala komuniti.
“Aku ngarapka raban RELA kelebih agi ba menua Selangau seruran beserakup sereta beintegriti dalam bejalaika tanggungpengawa diri,” ku iya rambau bejadika Pengerami Mesra RELA ba Balai Mayuh Guna Selangau, malam kemari.
Entulu mega bisi ngemendarka belanja sebela iya nya RM10,000 ungkup RELA Pelilih Selangau enggau RELA Pelilih Tatau. Lalu agih belanja RM5,000 ngagai RELA Pelilih Sibu.
Beserimbai enggau pengerami nya, Entulu ke mega Kaban Parlimen (MP) Selangau udah nyuaka agih belanja sepenyampau RM130,000 ungkup Bantuan Anak Didik Selangau (BADAS) enggau Yayasan Teknikal Rakyat Sarawak (TERAS), bantu kerusi roda enggau geran Projek Mit Pemansang Menua Pesisir (MRP).
Bisi 15 penerima BADAS nyengkaum sida ti nampung pelajar ba tikas Degree, Diploma enggau Matrikulasi sereta sida ti teulihka penyulut ba pemutus peresa perintah Sijil Pelajaran Malaysia (SPM) enggau PT3.
Pia mega bisi semilan iku nembiak sekula ba sitak Parlimen Selangau udah dipilih nerima dermasiswa Badan Pengasih Pengelantang Tenaga Bini-Bini Menteri (BAKTI) ba baruh program peransang pelajar ungkup sitak Parlimen Selangau.
Pengawa nyuaka pemeri nya dipenyadika bini Menteri ba Opis Menteri Besai, Datin Jacklyne Anthony.
Sama bisi datai Sekretari Politik Menteri ba Opis Menteri Besai Adriana Chumang Nyambing, Pemesai Pelilih Selangau Christopher Ranggau Unting, Pemesai RELA Pelilih Sibu Awis Adenan ngarika Direktor RELA Nengeri enggau bala ketuai raban bansa.