TERIMA MIH: Awang Tengah nyuaka setipikit ngagai seiku pesereta Kongres. Bela ngemata (ari kiba) Naroden, Lulie enggau Len.
KUCHING: Perintah Sarawak ngemeratka pengawa ngemansang kandang endur ke dibungkur tanah kerapa.
Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan madah tanah kerapa nyadi sebengkah tanah ke chukup unik sereta ngembuan potensial.
Berindik enggau nya ku iya, Laboratori Pemansik Tanah Kerapa Tropika (Sarawak) udah ditumbuh ngambi tau ngerembaika penau teknikal, saintifik sereta meretika atur ngemansang tanah nya enggau meruan.
“Kitai keran nentuka pekara pemansang ba tanah kerapa nyadi sebengkah agi komponen dalam atur pemansang di Sarawak,”ku iya rambau bejadi pengawa nutup Kongres Antarabansa Tanah Kerapa Ke-15 di sebuah hotel ditu, kemari.
Kongres ke diadu 5 hari berunggu berengkah 15 nyentuk ngagai 19 Ogos 2016 keterubah diatur di menua Asia lalu matak pengari ari mayuh bengkah menua.
Awang Tengah ke mega Menteri Pemansang Industri, Dagang enggau Pemeranak Puku pechaya kongres nya ulih nerenak pemereti enggau penau ke dalam sentang tanah kerapa ungkup penyereta.
Ku iya, asil ari kongres nya deka nyaup Perintah Nengeri nusun atur pemansang tanah kerapa nengah polisi ke engkeman agi.
“Perintah Nengeri maya ke diatu bisi Polisi Nguna Tanah ke alai enda kurang ari 1 juta hektar tanah udah digazet nyadi ‘Totally Protected Areas (TPA)’ lalu 6 juta hektar Kampung Mendam Nengeri (PFE).
“Kitai deka ngeransingka agi program ngintu pemaik kampung tu lalu sedia ngaga kerejasama enggau kompeni ke ngembuan pengelandik ba pekara ke bekaul, nyengkaum program pansik,”ku iya.
Kongres Antarabansa Tanah Kerapa Ke-16 deka diadu di Estonia ba taun 2020.
Bela datai Menteri Muda Pengatur Pengeraja Asal Datuk Mohd Naroden Majais, Menteri Muda Rampa Menua Datu Len Talif, Presiden Gerempung Tanah Kerapa Antarabansa Gerald Schmilewski, Direktor Laboratori Pemansik Tanah Besegup Sarawak Dr. Lulie Melling enggau Sekretari Mendam Opis Menteri Pengatur Pengeraja Asal enggau Rampa Menua Datu Sudarsono Osman.