Dikarang Rengenyan Labang//
BERATI: Masing disempulang Sulaiman (kiba) beratika penerang sebengkah kompeni ke ngambi awak ngiga pengereja pengawa nengah program Hari Kerjaya Kebangsaan 2016 ke diatur JTK ba Dewan Suarah kemari.
KUCHING: Raban graduet sekalika dalam bidang akademik enggau pengelandik, dilalau ngerebut peluang kereja ke bisi disediaka di nengeri tu, lalu anang kelalu milih kereja.
Sapit Kepala Menteri Tan Sri Datuk Amar Dr James Jemut Masing madahka, di nengeri tu mayuh macham industri ti begunaka pengereja pengawa kelebih agi dalam bidang pengelandik.
“Menua kitai bisi mayuh industri sereta nyendiaka mayuh bidang pengelandik, tang pengereja pengawa enda chukup (nangkup peminta industri). Ketegal pekara nya ngujungka industri ngambi orang ke salah dalam industri.
“Bepelasarka statistik ti dikeluarka Jabatan Tenaga Kerja (JTK) Sarawak (dalam taun 2015) bisi 3.5 peratus penyampau orang ke na dai kereja. Lalu penyampau nya (3.5 peratus) engka laban bisi pengelandik tang milih kereja lalu pengawa ke dipinta enda setipak enggau pemandai sida.
“Nya alai, anang milih kereja sereta anang milih ba seiti endur aja tang patut nguji ba endur (industri) ke bukai. Ke pemadu beguna iya nya kereja ke dipinta enda tau enda setipak enggau pengelandik diri,” ku iya.
Menteri Pemansang Infrastruktur enggau Perengka Pengangkut nya mansutka pekara nya dalam aum pengarang berita pengudah bejadi ‘Hari Kerjaya Kebangsaan 2016 Peringkat Negeri Sarawak & Pelepasan Konvoi Kembara Kerjaya’ ke diatur JTK ba Dewan Suarah ditu, kemari.
Bepelasarka statistik JTK, di Sarawak dalam taun 2015 bisi 1,258,300 iku Pengereja Pengawa; 1,214,800 iku Peranak Menua Tu Gawa enggau 43,5000 iku Nadai Pengawa.
Nyerumba Hari Kerjaya taun tu, JTK bisi ngatur program ‘Kembara Kerjaya’ ti mega keterubah diatur di nengeri tu, ke alai bisi 22 buah kerita nyereta pejalai ti berengkah ari Kuching kemari ngagai Bintulu sereta pulai baru 23 Ogos tu, ti diketuaika Direktor JTK Sarawak Datu August Buma.
Sekumbang pejalai nya, raban nya deka ngetu ba Serian, Sri Aman, Betong, saratok, Bintangor, Sibu enggau Bintulu. Lalu pemulai ari Bintulu kembara nya deka singgah ba Sarikei enggau Lubok Antu sebedau pulai ke Kuching.
Lalu ba beberapa palan pengetu Kembara nya, JTK Sarawak deka ngatur ‘Career Fairs’ iya nya ba Sri Aman, Sibu, Bintulu enggau Sarikei, ti dipasuk pengaji kompeni ke bisi nyendiaka enda kurang ari 1,500 peluang kereja ngagai pengiga kereja.
“Sehari tu (kemari) aja di Kuching bisi 27 pengaji ti nyendiaka urung 2,025 pengawa puang.
“Nengah program ke diatur JTK tu, pengiga kereja ngisi pom, setipak enggau pemandai sereta kereja dipinta lalu diinterivu pengaji tekala nya,” ku iya.
Kelimpah ari nya August ba jaku pengelalu madahka objektif perintah ke ngatur Hari Kerjaya nya ti dipenyadi sereta di serata Malaysia endang dikena meri peluang ngagai pengiga kereja terus betemu enggau pengaji.
“Objektif program tu diatur ngambika pengaji ulih betemu enggau pengiga kereja, dikena ngurangka isu pengaji kurang pengereja pengawa enggau ngurangka isu orang ti n adai kereja di nengeri tu,” ku August.
Bisi datai ngagai pengawa bejadika program nya kemari Direktor PERKESO Sarawak Philip Sangkan, Sapit Direktor JTK Sarawak Sulaiman Ismail enggau ke bukai.