BATANG AI: Sebuah rumah panjai ke nyadi entara penarit dagang temuai ditu, iya nya Rh Manggat di Menyang Taih amat begunaka bekal ai beresi ari perintah.
Tuai rumah Manggat Meringai, 64, madahka diatu sida serumah panjai nya bepanggai ba ai ujan enggau ai ari sungai ke besemak, ke diguna ninting hari nyengkaum bala temuai.
“Pemadu tusah ditu iya nya ai…. Aku ngarapka perintah ulih mantu nyendika bekal ai beresi ngagai kami,” ku iya.
Iya dikerandau nyerumba penemuai raban media ke diatur Sarawak Energy Berhad (SEB) ngagai Rumah Manggat apin lama, ti udah disikap ngena bekal elekterik kuasa solar ti diberi SEB.
Nitihku iya, peranak rumah panjai ke jauh di ulu Batang Ai nya ngelama tu bulih bekal ai ari sistem graviti ke udah bisi.
Taja pia, Manggat madahka penatai ai ke diambi ari bukit nya deka rangkai maya musim kemarau ti ngujungka sida putus bekal ai.
Ku iya, penusah ke ditapi nya chukup ngemediska sida laban tebal agi peranak ke diau ba rumah panjai nya orang tuai sereta gawa bekebun bumai.
“Semua ke diau ditu iya nya orang tuai laban sida ke biak semua udah ke mengeri, gawa.
“Nya alai, tusah amat kami ngangkut ai kelebih agi ari sungai ke jauh ari rumah kami,” ku iya.
Rumah panjai nya digaga dalam taun 1993 pemanjai 13 pintu enggau pemayuh tubuh lebih 100 iku.
Rumah panjai nya seiti ari palan ke suah endur temuai ari menua luar datai nemuai, ke datai ngelantangka diri ngagai Aiman Batang Ai Resort, ditu.