KUCHING: Penanggul suntuk bekal ai di Sebangan, Sebuyau deka teputar pengudah utai ke nyadi pun penanggul deka diadu lengkas.
Menteri Muda Perengka Guna Mensia Mayuh (Bekal Ai) Datuk Roland Sagah Wee Inn madah atur ngemanah enggau masang batang paip baru ke beungkus RM5 juta udah dikemendar lalu pengawa deka berengkah pengudah belanja disedia.
Ku iya, penusah di Sebangan ukai bepun ari bekal ai ti kurang ari palan pemeresi Sebangan (WTP), tang ketegal sekeda paip ari pam besai WTP nuju tangki besai bisi tiris.
Paip besi (DI) 280 mm ku Sagah udah kelalau lama lalu endang mudah pesuk.
“Tiris ba paip besai ngachau peneras ai enggau pemayuh ai ke disimpan dalam tangki.
“Ketegal peneras ai ti enda kuat ke ngujungka ai tangki enda penuh, pekara nya ngujungka bekal ai kurang,”ku iya pengudah nemuai meresa WTP Sebangan Hari Empat tu tadi.
Nitihka penerang ari Sagah, projek mungkur pengawa ngangkatmanah paip 280 mm DI pemanjai 8KM ngagai 14KM ke diganti enggau bansa paip 280mm (HDPE).
Ku iya, Perintah Besai udah ngemendar projek tang ngarap Perintah Nengeri dulu ngeluarka belanja ke alai belanja nya ulih ditagih jemah ila.
Iya mega madah projek ngangkatmanah paip ke mekal ai ngagai rumah ke beungkus RM2.3 juta udah mega dikemendar lalu benung nganti belanja nya dikeluar.
Opis Bekal Ai Menua Pesisir (JBALB) deka netapka penyampau belanja lalu deka dianjung ngagai menteri ti deka ngiga belanja ari Perintah Nengeri.
“Pengudah JBALB teulihka belanja, kededua tinda projek deka dipansut,”ku iya.
Nyempulang Sagah nemuai ngagai WTP Sebangan iya nya Menteri Muda Pemansang Industri (Pemeranak Puku Enggau Promosyen) Datuk Julaihi Narawi.
Seduai mega bisi ngulu randau enggau ketuai komuniti di Sebangan alai seduai mendingka pemar ke ditapi ketegal penusah suntuk bekal ai nya.
Julaihi ke mega ADUN Sebuyau madah Perintah Nengeri meretika pemar ke ditapi peranak Sebangan enggau Sebuyau sentang pekara nya.
Ketegal nya iya (Julaihi) udah mai Sagah datai nemuai lalu meratika pemar ke ditapi sida.
“Asil ari penemuai menteri muda enggau aku empu, kitai ngarap penusah suntuk bekal ai di Sebangan ulih diputar jemah,”ku iya.
Iya mega meri jamin ngagai ketuai komuniti diak perintah maya ke diatu benung nusun pelin timpuh panjai endur nentuka peranak menua nya teulihka bekal ai ke meruan.
“Pemar ke ditapi kita diperatika enggau berat ke alai Perintah Nengeri keran mutarka isu suntuk bekal ai.
“Kededua pelin timpuh pandak enggau panjai udah ditusun lalu benung nganti dipejalai,”ku iya.