KUCHING: Pemutus tiga iku Kaban Kunsil Nengeri (ADUN) ti milih nyereta Parti Rakyat Bersatu (UPP), nya bepanggai ba (sida) empu tang patut meri sukung ke tegap ngagai Barisan Nasional (BN).
Chairman Barisan Nasional (BN) Sarawak Datuk Patinggi Tan Sri Adenan Satem madahka pemutus tiga iku ADUN ti nyadi chalun terus BN ba pengawa bepilih nengeri (PRN) Ke-11 bulan Mei tu tadi ke milih nyereta Parti Rakyat Bersatu (UPP), nya pilih sida empu.
Tang ti pemadu beguna ku Kepala Menteri nya, ADUN nya terus nyukung BN.
“Sida ti milih nyereta UPP, nya bepanggai ba sida empu . Ti pemadu beguna iya nya sida ke dipilih nya terus nyukung BN, nya pemadu beguna,” ku iya dalam aum pengarang berita ke diatur ba bilik aum Ringkat 22, Wisma Bapa Malaysia ditu, kemari
Adenan mansutka pekara nya lebuh dipinta meri penerang bekaul enggau tiga iku ADUN ke tetap milih nyereta UPP, iya nya Datuk Dr. Jerip Susil (Mambong), Dr. Johnichal Rayong (Engkilili) enggau Ranum Mina (Opar).
Dr. Jerip, Dr Rayong enggau Ranum sebedau tu ningkilka diri ari UPP ngambika ulih nyadi chalun terus BN ba PRN Ke-11 apin lama.
Penyulut tiga chalun nya ba PRN apin lama, sida tiga sama enggau chalun terus BN ke bukai dipinta milih parti kompenan BN.
Taja pia, Dr. Jerip, Dr Rayong enggau Ranum tib kala bisi ati deka nyereta Parti Pesaka Bumiputera Bersatu (PBB), tang dipinta betemu sereta ngiga timbal ari rayat ke milih sida, lalu asil ari nya rayat ke dipegai minta sida nikal baru ngagai UPP.