SARIKEI: Menteri Perengka Guna Mensia Mayuh Sarawak, Datuk Dr. Stephen Rundi Utom, dekaka ulah ti talukka menua seruran diterenak ba tikas pemadu tinggi ba raban nembiak rebak baru.
Ku iya, pengawa tu beguna amat dalam nentuka pengelantang ari kuasa merintah diri ke udah ditegika rebak ke dulu suba terus dijaga sereta dikenang.
“Mayuh udah enda ingatka pengelantang ti diasaika kemaya hari tu asil ari pengawa rebak ke dulu suba, alai sida sanggup begadai nyawa ngetanka hak menua sereta bansa.
“Pengelantang ari kuasa merintah diri ti diasaika menua kemaya hari nya perais pemadu besai ke patut dikenang semua piak nadai ngira politik ke dipegai, jalai pengarap enggau bansa.
“Kuasa merintah diri tu identiti ke dipenggi semua, lalu iya mega seiti agenda ti nempa sereta ngasuh rayat idup likun sereta lantang dalam seiti komuniti,” ku iya.
Stephen mantaika jaku tu rambau Pengerami Pengawa Ngelancharka Bulan Merdeka enggau Kimpin Ngibar Jalur Gemilang Renggat Nengeri Sarawak, semak ditu, kemari.
Pengerami tu udah diatur ba Laman Dewan Suarah Sarikei sereta udah digulu urung 500 iku rayat di menua nya.
Kenu ku Stephen, program tu seiti ari aktiviti ke manah dalam mulaika kenang rayat ba menua tu pasal pemesai reti Hari Merdeka ngagai semua rayat di nengeri tu.
“Mayuh ari kitai udah enda ingat pemesai reti Hari Merdeka tu, sereta kitai ke nyadi peranak asal Malaysia patut beterima kasih enggau pengelantang ke udah diasaika kitai.
“Kitai ke nyadi peranak asal chukup betuah sereta beterima kasih ngagai pengelantang tu, endang patut ditan, ditegap sereta diterenakka agi penalukka bansa ngagai raban bansa Malaysia ngambika pengelikun, pengelantang enggau pemaik menua tu ulih ditan sereta dijaga dataika belama iya,” ku iya.
Ku Stephen nambah, lebuh raban bansa meretika semangat Rukun Negara ke nyadi tiang penyerakup sereta daya idup rayat Malaysia, sida deka ulih napi penusah ari dalam enggau luar ke sengaja deka ngasuh menua siga enggau nulak iya tekala nya.
“Ngagai raban nembiak rebak baru, udah nyadi tanggungpengawa kita rebak ke dulu agu nerenak sereta ngidupka penaluk menua ngagai raban tu ngambika sida enda ngelengka reti enggau pemesai guna nyaga nilai kuasa bibas merintah diri tu.
“Pengawa tu beguna amat nentuka raban nembiak rebak baru ngingatka pengawa rebak ke dulu berambunka nyawa negika hak menua enggau bansa rayat Malaysia,” ku Stephen nandu.
Sama bisi datai ngulu pengerami nya Pemansang Pengereja Pengawa enggau Latih ke lalu nyadi Menteri Muda Rampa Menua Sarawak, Datu Len Talif Salleh, Menteri Muda ba Opis Kepala Menteri (Undang-Undang enggau Adat Bumiputera) ke lalu nyadi Menteri Muda Seni enggau Main Asal, Datuk John Sikie Tayai, Menteri Muda Ekonomi Menua Pesisir enggau Ulu sereta Kebun Bedandang Besai, Datuk Francis Harden Hollis, Kaban Kunsil Nengeri (ADUN) N45 Repok, Dato Sri Huang Tiong Sii, ADUN N46 Meradong, Ding Kuong Hiing, ADUN N48 Meluan, Rolland Duat Jubin, ADUN N77 Telang Usang, Dennis Ngau enggau Residen Bagi Menua Sarikei, Dr. Anthony Valentine Laiseh.