KUCHING: Nengeri Sarawak ngemeratka pengawa ngintu tanah besegup di nengeri tu, ke udah ngelui ari komitmen nasional ti ngeletakka pengabis kurang 50 peratus tanah di menua tu, digalau nyadi kampung.
Kepala Menteri Datuk Patinggi Tan Sri Adenan Satem madah di Sarawak, menua tu udah ngelui komitmen nasional enggau penyampau kampung 65 peratus bepelasarka gambar Satelit ke taun 2013/2014.
“Polisi Menua ngintu sereta penumbuh ekonomi udah di perambu sereta digaga sistematik, ari Pelin keterubah Besai Jelu Siga di Sarawak dalam taun 1996, nyentuk ngaga undang-undang Ordinan Palan Biodiversiti 1997, ke alai kededua tu nyadi pemerat ba pengawa nyaga jelu siga sereta penemu tradisional,” ku Adenan.
Iya madah munyi nya lebuh bejadika Kongres Tanah Besegup Antarabansa ke-15 di sebuah hotel antarabansa ditu, kemari.
Dalam taun 2015, projek ‘The Research for Intensified Management of Bio-Rich Areas (RIMBA)’ dipunka kena nyendiaka palan ngaga pengawa pansik ke bekerejasama enggau gerempung antarabansa, ngemansangka endur ti kaya biodiversiti sereta silik sereta ngena chara ke praktikal mutarka atur ba endur nya nyengkaum pengawa nyaga jelu mayas di Sarawak.
“Tu mandangka komitmen Sarawak ngagai komuniti antarabansa, ngemendarka kampung kami ditu tau alai tukang pansik antarabansa bejalaika pansik sida.
“Kami ngelalu orang ke landik ari menua luar bejalaika pansik sida ditu,” ku iya.
Adenan ti mega nyadi Menteri Pengatur Pengeraja Asal enggau Rampa Menua madahka kandang endur ti udah dikelala nyadi palan jelu mayas, nyengkaum kandang ke diintu, ditagang enda tau alai bekebun.
“Menua tu udah nyain Sempekat ‘Transboundary’, iya nya ‘The Heart of Borneo’ enggau Sabah, Brunei sereta Indonesia,nyengkaum Sarawak setuju ngaga sebuah koridor dalam kandang kampung ti dikemansangka sereta endur ngintu jelu mayas, flora sereta fauna di Borneo.
“Perintah kami, aku empu udah ngeletakka undang-undang diatu, sebarang pengawa nebang kayu, ngeluarka lisin kayu diatu udah diketuka dalam kandang dua taun tu.
Di Malaysia ku iya, ngembuan mayuh tanah ke dipelabaka bisi 33 juta hektar, lalu ari penyampau tu, 2.43 juta hektar (ha) tanah besegup.
“Ari penyampau nya tadi, urung 66 peratus (tauka 1.6 juta hektar di Sarawak) ke mungkur 13 peratus penyampau tanah di menua tu,” ku iya.
Di Sarawak, tanah besegup tropika dikemansangka nyadi tanah endur bumai tauka endur kebun kenyau ari kelia, lalu semina baru tu tadi, tanah tu endur bekebun sawit, ku iya.
“Komunti kami ditu, iya nya sebagi ari orang asal endnag beridup ba tanah besegup kenyau ari kelia, endur bekebun sagu, nyiur sereta komoditi bukai.
“Sejarah mega mandangka dalam taun 1901, keterubah orang ke datai ari menua China dibai ke menua tu, nyadi orang ke keterubah ngemansangka menua tengah Sarawak, ke alai kandang menuanya mayuh tanah besegup,” ku iya.
Tanah nebing sungai sereta tanah besegup di menua tu, nyadi endur ke ngembuan pemisi strategik ti ngujungka Perintah Nengeri ngaga pemutus deka muka tanah nebing sungai ke baruh, endur betanam betupi sereta ngemansangka kebun.
“Nya ngambika ulih ngeluarka pemakai, lalu nambah pemakai ke rayat menua tu ke majak nambah, lalu dalam timpuh ke sama nya mega ngemunaska penyeranta di menua pesisir.
Kelimpah ari nya, Adenan madahka nengeri Sarawak enda kala betapi enggau penusah angus tanah besegup baka menua bukai ke besepiak . Kongres tu ti berengkah kemari nyentuk 19 Ogos tu, ke berambaika leka jaku ‘Peatlands in Harmony: Agriculture, Industry and Nature’ digulu urung seribu iku raban penyereta ke bepengelandik dalam tanah besegup ari serata dunya sereta deka mantaika urung 11 iti keretas kereja ti deka dibantaika pakar tanah besegup ari serata dunya.
Sama bisi ngulu atur pengawa tu kemari, Menteri Industri Kebun Bedandang Besai enggau Komoditi Datuk Seri Mah Siew Keong, Sapit Kepala Menteri ti mega Menteri Pengawa Betanam Betupi Moden, enggau Ekonomi Menua Pesisir, Datuk Amar Douglas Uggah Embas, chairman Salcra Datuk Patinggi Tan Sri Alfred Jabu, Menteri Kereja Raya Dato Sri Fadillah Yusuf, Presiden International Peatland Soceity, Prof Bjorn Hanell, Presiden Malaysian Peat Soceity, Frederick Haili Teck enggau Direktor Makmal Palan pansik Tanah Besegup Tropika, Dr Lulie Melling.