LONG LENG (BARAM): Pengeransing komuniti Penan di Long Leng, Baram ti bejalaika pengawa kediri empu ngangkatka tikas pemanah enggau status pengidup patut nyadika teladan ngagai bansa Penan bukai ba kandang menua nya.
Kaban Kunsil Nengeri (ADUN) Telang Usan, Dennis Ngau madah, iya mujur sereta bebasaka pengawa komuniti dia ke ngereja pengawa kediri empu ngubah sereta enda kelalu ngelempaika pengarap ba bantu ari piak luar.
Dennis madahka, pengeransing enggau inisiatif tu dibantai nengah pengawa sida ngemansangka rumah panjai, gerija Sidang Injil Borneo (SIB) enggau rumah pastor ngena belanja sida empu seraya nganti agih belanja ari perintah besai.
“Pengeransing ngena belanja diri empu dulu ngayanka bala kita endang bebendar deka ngemanahka tikas pengidup sereta nyenggala ngayanka peranak Long Leng enggai tinggal jauh ari bansa bukai,” ku iya rambau pengawa nasih tanah ngaga rumah panjai, gerija SIB enggau rumah pastor di Long Leng, Baram urung enam jam pejalai nengah jalai batang ari Miri.
Sama bisi datai Ketuai Raban Bansa Penan, Temenggong Datuk Hasan Sui enggau Pemangku Pemesai Pelilih Long Lama, Ezra Uda.
Dulu agi ari nya, Ketuai Raban Bansa Long Leng, Maister Lolee madahka, sida ngena belanja diri empu seraya nganti agih belanja ke dipinta rambau pejalai Menteri Besai Datuk Seri Najib Tun Razak ngagai Baram sebedau tu dikemendar.
Dennis mega ngelalau bansa Penan dia nambahka bemacham pemansut penatai pemisi sereta enda kelalu bepanggai ngagai asil kampung enggau sungai laban enda selama iya bisi.
Dalam pekara tu, iya merambu bansa Penan ngulihka servis penyanding penemu ari Opis Betanam Betupi ba kandang menua sida baka utai tanam getah enggau sawit.
Ba lansa ke bukai, Datuk Hasan ngingatka bansa Penan ngambi ngemeratka pekara pelajar dalam pengidup laban semina pelajar aja ulih ngubah pengidup ke menyana jemah.
Ku iya nambah, bala anak bansa Penan enda patut irau laban Serakup Pemansang Tipun Penan (PETIPUN) bisi wang turu disediaka perintah dikena mantu bala anak Penan nampung pelajar.