KUCHING: Audisyen Pekit Bintang Klasik Iban (PBKI) 2016 ti diatur kena 13 haribulan Ogos tu tadi ba palan bebeli barang Summer Mall udah milih 16 iku pesereta ngagai semi final ke deka diatur ba endur ke sama kena 27 Ogos, berengkah pukul 2 nyentuk 5 lemai.
Berebak enggau Chairman Pengatur PBKI 2016 ti mega Presiden Gerempung Pemansang Seni enggau Main Asal Dayak Kuching (PPSKDK), Mevryn Tajem meri besai terima kasih ngagai sambut ke manah ari bala pemekit sekalika nya ari jauh enggau ke semak nyengkaum bala peminat lagu Iban, sereta bansa bukaiti sama rinduka lagu Iban laban udah sama datai nyukung ngemujurka audisyen nya.
“Terima kasih ngagai bala pemekit sekalika nya ari jauh tauka semak enggau bala peminat lagu Iban, nyengkaum bansa bukai bukai ti sama rinduka lagu Iban, laban udah sama datai nyukung ngemujurka audisyen nya”.
“Ngagai ti enda dipilih, endang udah adat bepekit anang asa tang tau nguji baru dudi ila”, pia ku Mervyn.
Enam belas iku pemekit ti mujur dipilih ngagai semi final iya nya Tony Rumpang, Thomas Reddy,Lawrence, Rosyah Bali’ee,Yusup Mas, Sharifah Hanifah, Bahtea Mohd Taufik, Spencer Meringai Liew, Bandi Ali, Hamidah, Vivien Tsai Pei Chin, Linda Lya Sanjan,Azami Kipli, Wendy Eugene, Maxwell Richard enggau Slyvia Umang.
Kelimpah ari nya, semua 16 iku pemekit ti mujur nyingkang ngagai semi final mega deka dipadah nengah aplikasyen Whatsapp, SMS enggau Facebook nyengkaum pekara bukai ti bekaul enggau pekit nya.
Mavryn mega madah, semua 16 iku pemekit ti mujur ngagai semi final nya deka dibai ngaga’showcase’ ti diatur ba Ranyai Clan Stutong, berengkah pukul 9 malam kena 25 Ogos 2016 tu.
Tuju showcase nya diatur ngambika bala pemekit ulih nyendiaka diri ari sukut penegap runding maya napi mensia mayuh lebuh ti belagu ba atas panggau sereta meri awak ngagai bala peminat ngulurka penemu pasal pekit enggau pesereta ti mujur dipilih nyingkang ngagai renggat semi final. Maya nya mega bala pemekit ti dipilih tau mai bala pangan enggau kaban ngambika meri sukung ngagai sida.
Nengah awak nya mega, Mevryn sekali ari ngenataika pengaga ati ngagai palan bebeli barang Summer Mall, Ranyai Studio, Manang Sports Brand, Dennis Ngau Sape Maker, Utusan Borneo/Borneo Post, Cats Fm, komiti pengatur pekit enggau Wai Fm Iban laban ti udah melanja sereta nyukung Pekit Bintang Klasik Iban (PBKI) 2016.
Sukung nya besai amat reti ngambika kitai sama besaup nempa penanyi Iban ke bekualiti sereta ngangkat industri muzik Iban, ku Mervyen.
Champion PBKI 2016 deka mai pulai perais mata duit RM2,500, trofi enggau setipikit, lumur dua deka mai pulai perais RM2,000, trofi enggau setipikit lalu pemenang lumur tiga deka nerima perais mata duit RM1,500, trofi enggau setipikit.
Kelimpah ari nya, lima iku pemekit mega deka nerima perais saguhati iya nya mata duit RM300, trofi enggau setipikit, lalu nambahka nya sada nyawa ke pemadu manah enggau perindang ti pemadu manah sama deka mai pulai mata duit RM300, trofi enggau setipikit.
Renggat final PBKI deka diatur kena 24 September, ti sama diatur ba Summer Mall, Kota Samarahan.