Kitai patut nemu buah Merdeka ke diasaika diatu ukai datai muntang tang asil ari pengering ati
ENGKILILI: Kaban Kunsil Nengeri (ADUN) Engkilili Dr Johnical Rayong Ngipa meransang mensia mayuh bela meretika enggau dalam pasal Bulan Merdeka ke diasaika diatu.
Ku iya nembiak rebak baru diatu betuah amat laban ada sereta besai ba menua ke benung likun sereta nadai laya ke ngujungka bebadi nyawa baka 53 taun ke udah.
“Maya jeman aki ini tauka lebuh apai indai kitai agi idup kelia sida chukup pedis ngidupka diri (survival) tang nembiak kemaya hari tu chukup nyamai laban semua utai bisi magang.
“Uji perati bisi maya sida tepasa betanchang perut ketegal suntuk pemakai lalu langsung nadai ngasaika perengkaguna ke dipeda sehari tu…nya alai keingatka pemedis orang kelia ke sanggup begadai nyawa dikena nentuka pengelikun tejamin,” ku iya.
Iya madah munyi nya rambau pengerami bejadika jalai kampung Rumah Will Mingat, Stuga, ditu, ensanus.
Ku iya, nembiak kemaya hari tu patut nemu buah merdeka ke diasai diatu ukai datai muntang tang asil pengering ati ke disambut enggau sabak pengudah orang ke berani alah ba jari munsuh.
“Mega nya asil ari penyanggup bujang berani berambun nyawa lalu nya alai keingatka penusah sida.
“Dikena ngetanka pengelikun chukup pedis sereta beguna awak ke lama tang enti deka mechahka iya chukup muntang,” ku iya.
Nangkan nya ku iya, sebarang elemen ke enda manah ke tau mechahka penyerakup patut diiar ke tisi laban nya nadai nguntungka sebarang orang lalu enti kitai meratika menua bukai ke bisi penyarut ukai semina ngerusak menua tang menua ngelenyauka nyawa rayat ke nadai salah.
Ngenang silik, Dr Rayong meransang rayat lebih agi bala pengundi ngambika terus nyukung Barisan Nasional (BN) ba pengawa bepilih besai ke deka datai.
“Panggaika pengarap kita ngagai chalun BN lalu ba sitak tu udah tentu deka diarika Datuk William Nyalau laban iya seiku orang ke bagas gawa, seruran ngabas rayat lalu aku mega chukup nyamai begulai pengawa enggau iya.
“Tejuka ketuai renggat tinggi baka Kepala Menteri Datuk Patinggi Tan Sri Adenan Satem berandau enggau perintah besai bekaul enggau pangawa ngambi pulai kuasa Sarawak laban enti kuasa dipegai piak bukai nya tentu ngemuntanka juluk nya,” ku iya.
Berebak enggau nya iya mega minta rayat terus ngemansang tanah diri empu ke agi puang enggau asil utai tanam komoditi ngambika ulih nyungkak penatai pemisi diri empu.
“Gaga bidang betanam betupi nyadi pengawa dagang ukai semina ungkup diri sebilik aja…laban perintah merambu penatai pemisi rayat di menua pesisir patut manggai RM4,000 sebulan,” ku iya.
Berebak enggau nya, Nyalau ke bela bisi datai madah, orang ke bisi menggi tanah anang nagang piak Opis Tanah enggau survei nyukat tanah sida.
“Anang nangi, perintah nadai ati deka ngambi seinchi pan tanah rayat lalu tanah nya jemah deka diberi surat palan tanah nitihka Seksyen 16,” ku ya.
“Aku chukup nyukung inisiatif perintah BN tu laban iya deka meri pemaik ngagai rayat lebih agi sida ke bisi ngempu Tanah Adat Bansa Asal (NCR),” ku iya.
Ba pengerami nya mega, Dr Rayong bisi ngungkupka geran MRP beungkus RM6,000 enggau RM3,000 ungkup Komiti Pemansang enggau Pengelikun (JKKK) sereta Biro Indu. udah nya, Nyalau nyendiaka agih belanja dikena ngaga langkau injin padi.
Sama bisi datai iya nya pemesai JASA Sri Aman Lubok Antu Geoffrey Ricky Maba, Pemesai Jasa Edwin Anchih, Ketuai Polis Lubok Antu DSP James Jonathan, pengari Sekretari Opis Kunsil Pelilih Lubuk Antu Melo Agan, bala raban JTS, penghulu, kunsilor enggau lebih 30 iku tuai rumah ba Engkilili, Lidong enggau Skrang.