KUCHING: Polis deka majak chakah bejalaika pengawa matau sereta mansik dikena nentuka pengamat penerang kes bekaul enggau dadah ba semua kandang genturung pendiau di mengeri Kuching.
Opis bekuasa nya madahka semua penerang tauka ripot ari mensia mayuh deka dikemerat sereta diperatika.
Taja pia, naka ke diatu senario dadah di Pelilih Menua Kuching agi ulih dijaga berindik ari kes nya ulih diputar sereta orang ke nyadung ulih ditangkap sebdau tu.
Bekaul enggau kes ke nyadi ba kadang genturung pendiau di Jalai Song, Ketuai Polis Pelilih Menua Kuching ACP Abang Ahmad Abang Julai ngenukuka bisi nerima ripot bekaul pekara nya.
Kenyau ari nerima ripot nya, Bagi Tasat Pengawa Jai Nakortik Pelilih (BSJND) Kuching udah bejalaika pansik enggau pengawa matau ba kandang endur nya enda ngira maya.
“Tang nyentuk ke diatu orang nya nadai udah dipeda tauka ditemu. Kami deka terus matau kandang endur nya enggau endur bukai ti engka bisi potensi nyadi palan transaksi.
“Penerang nya agi mimit. Taja pia polis terus ngumpul dikena nangkap enggau nawa orang nya nyema bisi pematut tauka pengamat.
“Kami minta mensia mayuh datai meri penerang, lalu indentiti pemeri penerang nya deka dilalai,” ku iya.
Semua orang sereta sekeda piak nya dipinta liat ati nganti sereta meri awak ngagai polis bejalaika pengawa.