KUCHING: Pengawa nyaga pengelikun ba kandang garis entara menua darat sepemanjai 2,019.5 kilometer (km) entara Sabah, Sarawak enggau Kalimantan di Indonesia terus ditegapka lebuh 31 Briged Infantri berengkah beoperasyen ila.
Panglima Divisyen Pertama Infrantri Malaysia Mejar Jeneral Datuk Stephen Mundaw madah, briged nya naka ke diatu agi ba renggat ditumbuhka, ti deka ditegapka enggau penyampau ke mayuh iya nya lima batalion tauka lebih 5,000 iku nyaga kandang garis entara menua.
“Setipak enggau peminta guna ngetanka menua kelebih agi di Sarawak, 1 Divisyen deka terus bebendar ngangkatka sereta enggau komprehensif ba taun ke deka datai dikena napi sebarang penanggul tauka keruga lkeebih agi ba garis entara menua.
“Pengawa nusun baru raban enggau penumbuh 31 Briget Infantri ulih nyemaka pengulih nyaga pengelikun enggau penyendia 1 Divisyen,” ku iya lebuh bejaku ba Gempuru Hari Penumbuh 1 Divisyen Ke-50 (Jubli Emas) di Markas Divisyen 1, Kem Muara Tuang, ba Jalai Datuk Mohammad Musa, Kota Samarahan ditu, kemari.
Sama bisi datai, Panglima 3 Briged Brigedier Jeneral Mohd Bustaman Mat Zin, Panglima 9 Briged Brigedier Jeneral Subari Tomo, Panglima 31 Briged Brigedier Jeneral Jamaluddin Jambi.
Stephen madah, taja pan bepun nyadi sebuah organisasyen mit sereta raban ti minimum lebuh ditumbuhka ba taun 1966, diatu udah mansang nyadi sebengkah raban soldadu ti bisi kredibiliti, profesional enggau kapasiti ti mayuh ngetanka nengeri tu.
Nitihku iya, I Divisyen bisi mantu mai pemansang ke menua senipak enggau pengawa tambah kedua ke alai semua bantu sereta ubah nya ngayanka pengulih enggau penyulut.
Penyulut ke diasaika diatu ukai datai baka nya aja ku iya, tang asil ari pemendar enggau penegap ti nyadika nama enggau pengulih 1 Divisyen dikelala dalam soldadu darat Malaysia.
“Pengelama lima dekad ke udah, 1 Divisyen udah betapi enggau mayuh pemar sekalika nya manah tauka enda ba pengawa nyaga nama enggau pengelikun menua kelebih agi nengeri Sarawak,” ku iya.
Iya mega minta 1 Divisyen patut seruran beratika gaya strategik serantau enggau dunya ti mandangka mayuh macham pemar ke ditapi ba pengawa nyaga pengelikun seraya begunaka raban ti besedia betapi enggau pemar nya.
“Dikena betapi enggau semua pekara ke nyadi kemaya hari tu, raban 1 Divisyen patut nyaga tauka nyikap diri sereta seruran beratika ubah ke diatu.
“Pemar ke diatu begunaka raban 1 Divisyen terus tegap nyikap diri ngena penemu nyengkaum penemu dalam bidang perang teknologi tinggi,” ku iya.