ENGKILILI: Rayat di nengeri tu diansak terus betunggang sukung ngagai Kepala Menteri Datuk Patinggi Tan Sri Adenan Satem ke benung nagih hak nengeri tu ari Perintah Besai.
Kaban Kunsil Nengeri (ADUN) Engkilili Dr Johnical Rayong Ngipa madahka pengawa ke dikereja Adenan patut disukung semua nadai ngira penemu politik laban deka meri pemaik ngagai semua jemah.
“Taja pia, pengawa ti dikereja Adenan ukai reti kitai deka pansut ari Malaysia, ukai baka nya. Tang ketegal hak ti nadai dikeibuh nitihka sempekat ke udah digaga dalam taun 1963,” ku iya.
“Nya alai, beri mih sukung ngagai iya ngambi pulai ke pemaik rayat Sarawak sereta raban nembiak rebak dudi,” ku iya lebuhka bejaku rambau Pengerami Ramah-Tamah Aidilfitri 2016 ba Kampung Melayu Engkilili ditu ensana.
Ngelansa pasal pengerami nya, ku Dr Rayong, pengawa ngatur rumah tebuka pengudah musim pengerami patut diteruska lalu anang ditejuka pia aja.
“Tu udah nyadi tanggungpengawa semua kitai ngetanka pengawa tu laban tu pelasar pemadu manah ungkup kitai ngedutka pemanah kaul enggau pangan diri ke bebida main asal enggau jalai pengarap.
“Tu mih pengelui dikembuan kitai di Sarawak kelebih agi di Engkilili. Taja bansa Melayu raban minoriti ditu tang aku ti nyadi ADUN ditu sereta Datuk William Nyalau (Badak) ke nyadi Kaban Parlimen (MP) enda kala ngemeluka sesebengkah bansa ba DUN tu nyengkaum bansa Melayu.
“Kitai semua peranak DUN Engkilili lalu pekara ti diasaika bansa Iban, endang bela diasaika bansa Melayu enggau China,” ku iya seraya nambah, pengelantang patut ditan sereta anang ngasuh raban ektremis pengarap muntang ensuruk tama ngagai runding rayat ditu.
Ku iya, nyadi ADUN ke udah dipilih iya endang bebendar ngamatka semua peminta enggau hak rayat ditu nyerumba juluk Adenan ke deka meda pemansang di menua pesisir seriris enggau pemansang di mengeri.
“Nya alai aku meransang semua rayat di sitak tu nyukung genap pelin pemansang ke udah dilangkar aku begulai enggau ejensi perintah bekaul ngambika juluk Adenan ulih dijapai, ngedut takah pemansang mengeri enggau menua pesisisr.
Ngelansa pekara ekonomi, Dr Rayong madahka pemesai guna rayat ngubah runding nyadika pengawa betanam betupi nyadi pemansut penatai pemisi sida ungkup timpuh panjai.
“Nyadika pengawa betanam betupi nyadi dagang meri penguntung berengkah ari diatu.
“Dikena nyapai juluk nya, aku minta semua kita ngaul diri dalam bidang ke ulih mansutka penatai pemisi tambah baka nanam lada chelum, sawit, koko, getah enggau ke bukai nentuka juluk perintah nengeri deka meda rayat bisi penatai pemisi RM4,000 sebulan dijapai,” ku iya seraya nambah pekara tu ulih dijapai nyema ngubah chara betanam ari ti mit ungkup diri empu ngagai skala ke besai agi.
Nerang silik, iya sekali agi ngelalau bala rayat kelebih agi pengundi ngambika nyukung William Nyalau maya Pengawa Bepilih Besai (PRU) ke deka datai.
“Nyangka kelalu tumu aku bejaku munyi nya tang aku ngarapka iya deka dichalunka baru lalu minta bala pengundi ba DUN tu enggau kominiti Melayu ditu terus nyukung Nyalau.
“Kebuah pia dikena ngemuntang aku ngelanggur pemansang ba DUN Engkilili lalu aku lantang gawa begulai enggau iya,” ku iya.
Berebak enggau nya, Nyalau mega bisi bejaku minta rayat enda ngemeranka ulah ati hari enggau pangan diri laban nya semina deka ngasuh kitai pambar.
“Kita patut belajar ari pekara ke nyadi ba menua Timur Tengah ke diatu benung sigau sereta rayat idup nadai pengelikun. Ulah begedi ke pangan diri patut diseliahka laban tu enda mai sebarang pemaik tang ngeruga kaul bansa nya empu,” ku iya.
“Kitai patut bebasaka bansa bukai taja sida raban minoriti laban ulah bebasaka pangan diri, bekerejasama enggau betulung ngujungka nengeri enggu menua kitai tu terus lantang sereta mansang,” ku iya.
Rambau pengarami nya, bela bisi diatur pengawa mandangka bemacham kek lapis ti digaga peranak tumpuk pendiau nya empu.
Dr Rayong mega bisi ngemendarka pemeri geran Projek Pemansang Mit Menua Pesisir (MRP) penyampau RM10,000 ngagai Komiti Pemansang enggau Pengelikun Genturung Pendiau (JKKK) Kampung Melayu Engkilili. JKKK surau mega nerima RM3,000 nyadi belanja dikena ngatur aktiviti ninting taun sida.
Sama bisi datai ngulu pengerami nya, Ketuai Raban Bansa Suhaili Ahmad, Pemesai Opis Pekara Khas (JASA) Edwin Anchih, Ketuai Polis Lubok Antu DSP James Jonathan, Pemesai RELA Awangku Ibrahim, penghulu, bala kaunsilor sereta bala tuai rumah besemak enggau DUN Engkilili.