Barang sapa ditemu ngayanka video lagu nya enggau nadai pemendar ulih kena ukum
// Dikarang Chris Bishop //
KUCHING: Ketuai Penerit Adat Opis Dagang Dalam Menua, Gerempung Kerejasama enggau Pekara Bebeli Barang (KPDNKK) Sarawak, Abdul Hafiz Abdul Rahim netap nengah Akta Hak Cipta 1997, barang sapa ke ngayanka video lagu (vcd) ba media rama enggau nadai pemendar ari kompeni pengeluar tau diukum.
Tajapia ku iya, ripot patut dulu dikenatai ngagai KPDNKK ngambi tasat ulih dipejalai.
“KPDNKK deka nasat enti bisi ripot dikenatai lalu diadu nengah kerejasama Suruhanjaya Komu-nikasi enggau Multimedia Malaysia (SKMM).
“Kitai ulih nemu bagi sapa ke ngayanka video nya enggau nadai pemendar ari kompeni pengeluar lalu tau diukum,”ku iya ba pengawa nerima setipikit basa ari Gerempung Artis enggau Pemuzik Dayak (DAMA) di Opis KPDNKK Jalai Tun Jugah ditu, kemari.
Setipikit basa nya disua presiden DAMA ke mega Kaban Kunsil Nengeri (ADUN) Balai Ringin Snow-dan Lawan lalu nyadi kelai basa ngagai KPDNKK ke udah mujur ngadu kimpin ngemunas chelak tiru da-lam industri muzik Dayak.
Ngenang kaul ke sama, Abdul Hafiz mega ngelalau mensia mayuh ngeriput ngagai KPDNKK tauka terus ngagai DAMA enti bisi tetemu orang bejual vcd chelak tiru ba genturung pendiau sida.
Ku iya pekara nya berat ngambi KPDNKK ulih bejalaika tasat sereta nangkap orang ke ngereja ulah nya.
Nitihka penerang ari seiku menijar pengeluar album Dayak, orang ke bejual vcd chelak tiru nya udah nguna chara baru iya nya bejual terus ngagai genturung pendiau pengudah chara lama ditemu raban penerit adat KPDNKK.
“KPDNKK megai tanggungpengawa ngintu pemaik pesaka main asal Dayak nyengkaum muzik Iban, Bidayuh enggau Orang Ulu.
“Enti pengawa chelak tiru tu enda ditagang, pesaka tu tau lenyau pia aja. Ketegal nya, ripot ngagai KPDNKK tauka DAMA enti bisi tetemuka orang bejual vcd chelak tiru,”ku iya.
Iya madah ripot tau dikenatai ngagai ‘Toll Free’ 1800 886 800 tauka nengah e-aduan KPDNKK.