// Dikarang Judan Bungap //
ANDAL NYADI CHAMPIAN: Morshidi (tengah), Karim (kiba) enggau Residen Sibu Hii Chang Kee maya aum media di Sibu.
SIBU: Sarawak andal deka bulih lebih 60 iti midul emas ngambika tau ngempu gelar champian ba SUKMA XVIII Sarawak 2016 tu ti belabuh berengkah 22 Julai ke deka datai.
Menteri Raban Nembiak, Lumba enggau Main Datuk Abdul Karim Hamzah madah, pekit Bola Tampar, Taekwando, Boling, Petanque, Akuatik enggau Wushu dipelabaka ulih mai midul emas maya nya ila.
“Bola Tampar endang disagi sigi bulih midul emas,” pia ku iya maya aum media sepengudah nyempulang Sekretari Nengeri Tan Sri Mohamad Morshidi Abdul Ghani mantar pengawa bejadi Stadium Tertutup Sibu ditu, kemari.
Iya madah, Sarawak endang bisi pengelebih nyadi champian ba semua bengkah pekit tang agi empai datai ba tikas ti pemadu manah.
Taja pan baka nya, ku iya, ngena ulah Agi Idup Agi Ngelaban, iya pechaya tim Sarawak ulih mai pemujur ba SUKMA serak tu.
“Aku mega ngandalka tim Badminton kitai bulih pemujur maya tu ila taja kitai bela nemu Pulau Pinang endang bisi pemain ke landik pungka dikelala nengeri ti bepengelandik ba main badminton,” ku iya madahka baru.
Berindik ari nya, Karim ngarapka rayat nengeri tu ulih datai sampal nyukung atlit Sarawak maya nya ila.
Ba pekara bekaul, Morshidi madah, sepenyampau 468 iku atlit Badminton enggau Bola Tampar deka diau di Sibu sekumbang dua bengkah pekit nya diatur.