NINGA JAKU AKU: Chong (dua kanan) nerangka sekeda pekara ngagai (ari kiba) Manyin enggau Karim rambau pengawa ngelalu pengabang di rumah Karim kemari. Bela dipeda Julian (kanan).
Perintah Nengeri patut mantaika ubah ba pekara undang-undang dikena ngemujur juluk ngambi pulai kuasa
Dikarang Chris Bishop //
KUCHING: Konstitusyen Perintah Besai patut diubah enti kitai dekaka kuasa enggau hak asal Sarawak ke disetuju dalam Sempekat numbuhka Malaysia dipulai, ku Chairman Parti Tindakan Demokratik (DAP) Nengeri Chong Chieng Jen.
Bejaku ngagai pemberita rambau pengawa ngelalu pengabang Hari Raya ke diatur Menteri Muda Pengawa Berumah Datuk Abdul Karim Rahman Hamzah kemari, Chong nambah dikena ngemujur juluk nya Perintah Nengeri patut mantaika ubah ba pekara undang-undang dalam konstitusyen Perintah Besai.
“Aku ngelalau Barisan Nasional (BN) ngadu ubah ba undang-undang dalam konstitusyen Perintah Besai. Baka DAP, kami sigi udah netap pemutus enggau nyemetak.
“Nengah Lim Guan Eng, iya udah netap diak DAP deka nyukung ubah dalam konstitusyen ngambi tau mulaika kuasa enggau hak asal Sarawak ke nyadi seiti menua ke udah numbuhka Malaysia, ukai seiti nengeri dalam Malaysia,”ku iya.
Iya mansutka penerang tu nimbal jaku Presiden SUPP Datuk Dr Sim Kui Huan ti minta Kepala Menteri netapka Sarawak nyadi sebengkah menua dalam Malaysia ba runding enggau Perintah Besai dalam atur mulaika kuasa enggau hak Sarawak.
Chong ke mega Kaban Kunsil Nengeri (ADUN) Kota Sentosa enggau Kaban Parlimen (MP) Bandar Kuching mega madah BN bisi 122 iku MP lalu DAP bisi 38 MP lalu iya pechaya Parti Keadilan Rakyat (PKR) pan deka nyukung.
“Enggau penyampau nya, kitai bisi lebih dua pertiga lalu ulih ngubah konstitusyen. Anang semina nemu bejaku aja.
“Gaga ubah tu di parlimen ke alai semua sida tu sigi dalam perintah lalu status Sarawak sentang pekara nya ulih dipulai nengah ubah ba konstitusyen,”ku iya.
Aku ngansak Perintah BN mantaika ubah ba undang-undang dalam konstitusyen lalu aku deka ngepunka mosyen, tandu iya.
Nitihka penerang ari Chong, Genteran 1 Konstitusyen Perintah Besai maya numbuhka Malaysia netapka Sarawak nyadi sebengkah ari empat menua ti numbuhka Malaysia begulai enggau menua Sabah, Singapura enggau Malaya.
Ba taun 1976, ubah ba konstitusyen nya bisi diadu lalu netapka Malaysia diarika 13 nengeri nyengkaum Sarawak enggau Sabah.
“Nya mih maya status Sarawak ke nyadi sebengkah menua dikinsil,”ku Chong nambah.
Bela ngulu pengawa kemari Menteri Nembiak,Lumba enggau Penyerakup Dato Sri Michael Manyin enggau MP Stampin Julian Tan.