Dikarang Chris Bishop //
KUCHING: Mensia mayuh sekali agi dipinta nyaup raban polis nyeliah sereta ngemunas ulah jai dalam kandang mengeri.
Ketuai Polis Pelilih Kuching ACP Abang Ahmad Abang Julai madah pekara nya berat ngambi ulih nutup peluang orang jai arika terus ngereja pengawa salah.
Ku iya pekara nya ulih nyaup nentuka pengelikun enggau pengelantang ba tetiap genturung pendiau.
“Kitai meseti seruran nyeliah lalu meratka pengelikun diri nyengkaum reta tengkira ari orang jai nengah chara nutup peluang sida.
“Tanggungpengawa enda ulih dilempaika ngagai polis aja ke alai mensia mayuh patut begulai enggau polis ba atur ngintu pengelikun semua.
“Nutup peluang orang jai ngereja pengawa sida ulih nentuka pengelikun mensia mayuh diintu enggau manah,” ku iya.
Abang Ahmad mansutka jaku nya rambau program Polis Komuniti ke diatur di laman endur ngengkah entuka besemak Balai Polis Taman Hui Sing ditu, kemari.
Ngenang kaul ke sama, iya pechaya ikas indek penyalah jai ke nurun 10 peratus ungkup timpuh enam bulan taun tu asil ari bantu mensia mayuh ngagai polis.
Ketetgal nya, iya meri puji ngagai inisiatif ke digaga Gerempung Polis Komuniti kelebih agi ba atur nerenak pemereti sentang pemerat nyeliah ulah jai arika nyadi.
Iya mega ngelalau mensia mayuh ke bisi nyadi mansa kes nipu tauka kes bukai datai ngeriput penusah nya ba balai polis.
“Semina nengah riput nya polis ulih bejalaika pansik lalu anang rawan ngenataika diri ba balai polis,” ku iya.
Rambau program kemari, Abang Ahmad ke disempulang raban polis komuniti bisi bejalai seraya ke berandau enggau mensia mayuh ba sekeda kedai dalam kandang Taman Hui Sing.
Bela datai Chairman Gerempung Polis Komuniti Sarawak Datuk Lau Pang Heng.