KUCHING: Menteri Muda Pengerai Mensia Mayuh, Datuk Dr. Jerip Susil madahka perintah bedau bisi perambu deka ngaga sepital di Julau.
Kebuah pia ku Dr. Jerip, laban bisi klinik pengerai ke dipelabaka ulih nangkup peminta tauka pemayuh orang sakit dalam Pelilih Menua Julau.
Lebuh ti nyaut tanya Rolland Duat Jubin (BN – Meluan) pasal pekara nya, iya madahka sebuah klinik pengerai di Julau mega deka dikemanah ngagai tikas ke tinggi agi.
“Ba Pelilih Menua Julau bisi enam buah Klinik Pengerai ke ulih tetangkupka peminta guna peranak ti urung 15,449 iku orang. Sepital ti pemadu semak enggau Pelilih Menua Julau iya nya Sepital Sarikei ti penyauh urung 50 kilometer (km) enggau Sepital Sibu urung 70km, sereta ulih dilawa nengah jalai darat.
“Nambahka nya, dalam Langgur Pemansang Malaysia Lumpar Ke-11 (RMK-11) perintah mega bisi juluk deka ngemanahka Klinik Pengerai Julau ari ‘Jenis 6’ ngagai ‘Jenis 4’. Diatu mega bisi dua iku Pemesai Perubat meri servis ba Klinik Pengerai Julau.
“Nya alai, diatu perintah bedau bisi perambu deka ngaga Sepital Julau,” ku iya ba Sesi Tanya Saut, Penggal Keterubah Aum Kunsil Nengeri Ke-18, ti diatur ba Kompleks DUN ditu, pagi kemari.
Nambahka nya Dr. Jerip madahka di Julau bisi lima buah Klinik Pengerai ‘Jenis 6’ iya nya Klinik Pengerai Sekalong, Klinik Pengerai Lassi, Klinik Pengerai Ensiring, Klinik Pengerai Maong enggau Klinik Pengerai Nanga Entabai.